मलेसिया । नेपालका रसुवाकोगढीलगायत विभिन्न क्षेत्रमा बुधबार, भदौ १० गते आएको विनाशकारी बाढीका कारण भएको ठूलो मानवीय तथा भौतिक क्षतिप्रति सुदूरपश्चिमेली नेपाली समाज मलेसियाले गहिरो दुःख व्यक्त गरेको छ।
बाढीबाट प्रभावित नागरिकको उद्धार तथा राहतमा सहयोग पुर्याउने उद्देश्यले समाजले रु. १ लाख आर्थिक सहयोग गर्ने निर्णय गरेको छ। बिहीबार बिहान बसेको समाजको आपतकालीन बैठकले उक्त निर्णय गरेको हो।
विपद्को यस कठिन घडीमा बाढीपीडितको उद्धार, राहत तथा पुनःस्थापनामा सहयोग पुर्याउन समाजले आफ्नो तर्फबाट सहयोग गर्ने प्रतिबद्धता जनाएको छ। साथै, पीडितहरूको दुःख र पीडामा साथ दिन इच्छुक सम्पूर्ण संघ–संस्था, समुदाय तथा सहयोगी मनहरूलाई आफूले सक्ने सहयोग गर्न समाजले हार्दिक अपिल गरेको छ।
समाजका कोषाध्यक्ष प्रदीप भट्टले उक्त निर्णयबारे नेपाली जनता खबरलाई जानकारी दिनुभएको हो।
प्राकृतिक विपत्तिबाट प्रभावित नागरिकको जीवनरक्षाका लागि सबै एकजुट हुँदै मानवीय सहयोगमा जुट्नुपर्नेमा जोड दिँदै समाजले विपद्को यस कठिन घडीमा सम्पूर्ण नेपाली समुदायलाई बाढीपीडितहरूको साथमा उभिन आह्वान गरेको छ।
“विपद्को यस कठिन घडीमा सबै एकजुट भई बाढीपीडितहरूको साथमा उभिऔँ।”
