क्वालालम्पुर, मलेसिया | नेपाल आदिवासी जनजाति महासंघ, मलेसिया (NEFIN Malaysia) ले ३२औँ विश्व आदिवासी दिवस तथा १३औँ वार्षिकोत्सव–२०२६ भव्य रूपमा मनाउने भएको छ। कार्यक्रम २०२६ अगस्ट ९ (आइतबार) दिउँसो १२:०० बजे क्वालालम्पुरस्थित होटल हिमालयनको सभाहल मा आयोजना हुने आयोजकले जनाएको छ।
यस वर्षको विश्व आदिवासी दिवसको अन्तर्राष्ट्रिय नारा “आदिवासी र कृत्रिम बौद्धिकता (AI): अधिकारको रक्षा, भविष्यको निर्माण” रहेको छ। सोही नारालाई आत्मसात गर्दै कार्यक्रममार्फत आदिवासी जनजातिको भाषा, संस्कृति, परम्परा, मौलिक कला तथा पहिचानको संरक्षण र प्रवर्द्धनका विषयमा विशेष जोड दिइनेछ।
कार्यक्रममा मलेसियामा कार्यरत विभिन्न जातीय तथा सांस्कृतिक संस्थाहरूको सहभागितामा सांस्कृतिक झाँकी, परम्परागत नृत्य, मौलिक कला प्रदर्शन, सांस्कृतिक प्रस्तुति तथा आदिवासी जनजातिको पहिचान झल्काउने विविध कार्यक्रम प्रस्तुत गरिने आयोजकले जनाएको छ।
नेपालका विभिन्न आदिवासी जनजाति समुदायका प्रतिनिधि, सामाजिक अभियन्ता, बुद्धिजीवी, पत्रकार, नेपाली समुदायका अगुवा तथा मलेसियामा रहेका नेपालीहरूको उल्लेख्य सहभागिता रहने अपेक्षा गरिएको छ। कार्यक्रमले विदेशमा रहेका नेपाली आदिवासी जनजातिबीच आपसी एकता, सहकार्य तथा सांस्कृतिक सम्बन्धलाई थप मजबुत बनाउने विश्वास लिइएको छ।
नेपाल आदिवासी जनजाति महासंघ, मलेसियाले विगत १३ वर्षदेखि मलेसियामा रहेका नेपाली आदिवासी जनजातिहरूको हक, अधिकार, भाषा, संस्कृति र पहिचान संरक्षणका लागि निरन्तर रूपमा विभिन्न सामाजिक तथा सांस्कृतिक गतिविधिहरू सञ्चालन गर्दै आएको छ।
आयोजकले मलेसियामा रहेका सम्पूर्ण नेपाली समुदायलाई कार्यक्रममा उपस्थित भई विश्व आदिवासी दिवस तथा वार्षिकोत्सव सफल बनाउन आग्रह गरेको छ।
कार्यक्रम विवरण:
- कार्यक्रम: ३२औँ विश्व आदिवासी दिवस तथा १३औँ वार्षिकोत्सव–२०२६
- आयोजक: नेपाल आदिवासी जनजाति महासंघ, मलेसिया (NEFIN Malaysia)
- मिति: ९ अगस्ट २०२६, आइतबार
- समय: दिउँसो १२:०० बजे
- स्थान: होटल हिमालयनको सभाहल, क्वालालम्पुर, मलेसिया
