काठमाडौं । राष्ट्रिय मानव अधिकार आयोगले २०८२ भदौ २३ र २४ गते भएको जेनजी प्रदर्शनका क्रममा नेपाली सेनाबाट कमजोरी भएको ठहर गरेको छ।
जेनजी आन्दोलनका क्रममा भएका मानव अधिकार हननसम्बन्धी घटनाको अनुसन्धानपछि आयोगले बुधबार सार्वजनिक गरेको सिफारिस प्रतिवेदनमा उक्त निष्कर्ष उल्लेख गरिएको हो।
प्रतिवेदनमा भनिएको छ, “अनुसन्धानका क्रममा संकलित प्रमाणहरूको सूक्ष्म विश्लेषण गर्दा भदौ २३ र २४ गतेको प्रदर्शनका बेला सिंहदरबार, सर्वोच्च अदालत, राष्ट्रपति भवनलगायत स्थानमा तोडफोड, आगजनी तथा लुटपाटका घटनाहरू भएका छन्। देशभरि मानवीय, भौतिक तथा आर्थिक क्षति हुनुमा नेपाली सेनाको पनि कमजोरी देखिएको छ।”
आयोगले नेपाली सेनाले जनअपेक्षा अनुरूप राष्ट्रिय सम्पत्तिको सुरक्षा गर्न नसकेको तथा आम नागरिकको मानव अधिकार संरक्षणप्रति पर्याप्त संवेदनशीलता देखाउन नसकेको उल्लेख गरेको छ।
भविष्यमा यस्ता घटना दोहोरिन नदिन राष्ट्रिय सम्पत्तिको सुरक्षा र नागरिकको मानव अधिकार संरक्षणलाई प्राथमिकता दिन प्रधानसेनापतिलाई निर्देशन दिन सरकारलाई सिफारिस गरिएको छ।
त्यसैगरी, सिंहदरबारभित्र रहेको सेनाको गणका तत्कालीन प्रमुख तथा शीतल निवासस्थित सेनाका कमान्डरलाई सचेत गराउन राष्ट्रिय मानव अधिकार आयोग ऐन, २०६८ को दफा ५ अनुसार नेपाल सरकारको ध्यानाकर्षण गराउन पनि आयोगले सुझाव दिएको छ।
