सुर्खेत, ३० वैशाख ः सुर्खेतको वीरेन्द्रनगर नगरपालिका–७, फूलबारी टोलमा जुवा खेलिरहेको अवस्थामा घरबेटीसहित ८ जनालाई प्रहरीले पक्राउ गरेको छ।
जनक रोकायको घरमा हारजित हुने गरी जुवा खेलिरहेको भन्ने गोप्य सूचनाका आधारमा कर्णाली प्रदेश प्रहरी कार्यालय र जिल्ला प्रहरी कार्यालय सुर्खेतबाट खटिएको संयुक्त प्रहरी टोलीले बुधबार राति करिब ९:१५ बजे छापा मारेको थियो।
छापामार क्रममा प्रहरीले जुवाको खालबाट नगद रु ९५,१६६, ६ गड्डी तास तथा ९ थान मोबाइल बरामद गरेको जनाएको छ।
प्रहरीका अनुसार पक्राउ पर्नेहरूमा जुम्लाको सिजा गाउँपालिका स्थायी घर भई हाल वीरेन्द्रनगरमा बसोबास गर्दै आएका ४२ वर्षीय मनबहादुर बुढा, ४४ वर्षीय लक्ष्मण रोकाय, ३० वर्षीय लालबहादुर बुढा, ३४ वर्षीय लङ्कबहादुर बुढा, ४५ वर्षीय गम्भीर रावत, ३० वर्षीय विष्णु बुढा र ३१ वर्षीय हरिबहादुर रोकाय रहेका छन्। साथै, घरबेटी ३८ वर्षीय जनक रोकायलाई पनि प्रहरीले नियन्त्रणमा लिएको छ।
जिल्ला प्रहरी कार्यालय सुर्खेतका अनुसार पक्राउ परेका सबैमाथि जुवा सम्बन्धी कसुर अन्तर्गत थप अनुसन्धान भइरहेको छ।
