सम्पत्ति शुद्धीकरण कसुर अन्तर्गत अनुसन्धानका लागि नामुद बिचौलिया दीपक भट्ट पक्राउ परेपछि उनीसँग जोडिएका आर्थिक अपराधका नयाँ–नयाँ तथ्यहरू सार्वजनिक हुन थालेका छन्।
भट्टको आर्थिक साम्राज्यमाथि छानबिन भइरहेका बेला उनले लगानी गरेको नेपाल माइक्रो इन्स्योरेन्स कम्पनीमा अर्थसचिव डा. घनश्याम उपाध्यायले आफ्नी श्रीमती भगवती उपाध्यायको नाममा संस्थापक सेयर लिएको खुलासा भएको छ।
कम्पनी रजिस्ट्रारको कार्यालयमा दर्ता अभिलेख (दर्ता नं. ३०४३२०–७९/८०) अनुसार भगवती उपाध्याय संस्थापक सेयरधनीको रूपमा सातौँ नम्बरमा देखिएकी छन्। उपाध्याय परिवारको नाममा १० लाख रुपैयाँ बराबरको १० हजार कित्ता संस्थापक सेयर रहेको पाइएको छ।
उच्च ओहोदाका कर्मचारी तथा राजनीतिज्ञहरू नै आर्थिक प्रलोभनमा परेर बिचौलियाको अनियमिततामा जोडिनुले सरकारको सुशासन अभियानमा गम्भीर धक्का पुगेको विश्लेषकहरूको भनाइ छ।
भट्टको वित्तीय अपराधको सञ्जालमा अनुसन्धानको दायरा बढ्दै जाँदा ठूला खुलासा भइरहेका छन्। उनीसँग उच्च पदस्थ राजनीतिज्ञ, सरकारी कर्मचारी तथा नाम चलेका व्यापारी–व्यवसायीहरूको साँठगाँठसमेत देखिएको छ।
नेपाल माइक्रो इन्स्योरेन्स कम्पनीका आधिकारिक अभिलेखअनुसार कम्पनीमा कुल ४६ जना संस्थापक सेयरधनी रहेका छन्। साथै, अन्य केही चर्चित व्यक्तिहरूले पनि सेयर लिएको तथ्य बाहिर आएको छ।
भट्टको कम्पनीमा साझेदारी देखिएपछि गृहमन्त्री सुधन गुरुङ राजीनामा दिन बाध्य भएका छन्।
यसैबीच, व्यवसायी तथा हिमालयन रि–इन्स्योरेन्सका पूर्वअध्यक्ष शेखर गोल्छासँग सम्पत्ति शुद्धीकरण अनुसन्धान विभागले एक चरणको बयान लिइसकेको छ।
त्यसैगरी, शंकर ग्रुपका अध्यक्ष शंकर अग्रवाल र उनका छोरामाथि पनि अनुसन्धान अघि बढाइएको छ।
