क्वालालम्पुर (मलेसिया) – नेपाली कांग्रेस पार्टीको विदेशस्थित संगठन नेपाली जनसम्पर्क समिति मलेसिया ले यहीँ जनवरी ०४ गते आयोजना गर्न लागेको चौथो अधिवेशनको सम्पूर्ण तयारी पूरा भएको जनाएको छ।
आइतबार राजधानी क्वालालम्पुरस्थित होटेल ग्रेण्ड कन्टिनेण्टल मा बिहान ११:०० बजेदेखि सुरु हुने उक्त अधिवेशनमा नेपाली कांग्रेसका केन्द्रीय सदस्य तथा नेपाली जनसम्पर्क समिति समन्वय विभागका प्रमुख किरण राज शर्मा पौडेल प्रमुख अतिथिको रूपमा सहभागी हुने आयोजक संस्थाले जनाएको छ।
समितिका अनुसार अधिवेशनलाई प्रवास मलेसियामा संगठन विस्तार, लोकतान्त्रिक समाजवादका मूल्य–मान्यताको प्रवर्द्धन तथा नेपाली कांग्रेस समर्थकहरूबीच आपसी एकता मजबुत बनाउने महत्वपूर्ण अवसर का रूपमा लिइएको छ।
रोजगारीको सिलसिलामा मलेसियामा कार्यरत रहनुभएका, लोकतान्त्रिक समाजवादको सिद्धान्तमा विश्वास गर्ने तथा नेपाली कांग्रेसप्रति आस्था राख्ने सम्पूर्ण नेपाली दाजुभाइ तथा दिदीबहिनीहरूलाई अधिवेशनमा सहभागिताका लागि सार्वजनिक रूपमा हार्दिक अनुरोध गरिएको छ।
अधिवेशनमा सहभागिताका लागि मलेसियास्थित नेपाली राजदूतावास तथा विभिन्न संघ–संस्थालाई समेत औपचारिक रूपमा निमन्त्रणा गरिसकिएको आयोजक समितिले जनाएको छ। कार्यक्रमलाई थप आकर्षक बनाउन नेपाली कलाकारद्वारा सांगीतिक–सांस्कृतिक प्रस्तुति समेत रहने जानकारी दिइएको छ।
