मलेसिया । नेपाली कांग्रेसको प्रवासी संगठन नेपाली जनसम्पर्क समिति मलेसियाको अधिवेशनको तयारी तीव्र रूपमा अगाडि बढिरहेको छ।
यसैक्रममा दुई दिन अघिमात्र क्वालालम्पुरस्थित ग्रान्ड कन्टिनेन्टल होटलमा सम्पन्न बैठक समिति सभापति चोलाकान्त पंगेनीको सभाध्यक्षतामा सम्पन्न भएको हो। बैठकले चाँडै नै उपयुक्त मिति तय गरी लोकतान्त्रिक विधिबाट अधिवेशन सम्पन्न गर्ने निर्णय गरेको छ।
बैठकमा अधिवेशनलाई पारदर्शी, समावेशी तथा विधिसम्मत रूपमा सम्पन्न गर्न आवश्यक तयारीहरूबारे विस्तृत छलफल गरिएको थियो। साथै महाधिवेशन प्रतिनिधि छनोट, संगठन सुदृढीकरण, कार्यकर्ता परिचालन तथा अधिवेशन व्यवस्थापनसम्बन्धी विषयमा समेत गहन छलफल भएको जनाइएको छ।
नेपाली कांग्रेसको प्रवासी संगठनलाई थप सक्रिय, सबल र व्यवस्थित बनाउने उद्देश्यका साथ अधिवेशन आयोजना गर्न लागिएको जनसम्पर्क समिति मलेसियाले जनाएको छ।
