क्वालालम्पुर, मलेसिया । मलेसियाको क्वालालम्पुर अन्तर्राष्ट्रिय विमानस्थल (KLIA) मा नेपाली नागरिकहरू ठगी, लुटपाट तथा दुव्र्यवहारको सिकार बन्ने घटना बढ्दै गएको छ।
हाल मलेसियामा करिब चार लाखभन्दा बढी नेपाली नागरिक विभिन्न पेशा, व्यवसाय तथा रोजगारीमा संलग्न छन्। यसैक्रममा रोजगारी वा अन्य प्रयोजनका लागि स्वदेश फर्किने क्रममा विमानस्थलमा केही नेपाली नागरिकले अवाञ्छित गतिविधि, सामान लुटिने, ठगी हुने तथा दुव्र्यवहार सहनुपरेको गुनासो निरन्तर आइरहेको छ।
यसै विषयलाइ लिएर NRNA मलेसियाले यस्ता घटनाका कारण नेपाली नागरिकहरू आर्थिक, मानसिक तथा सामाजिक रूपमा गम्भीर समस्यामा परेको उल्लेख गर्दै सबै नेपालीलाई उच्च सतर्कता अपनाउन आग्रह गरेको छ। साथै संघले मलेसियाली सम्बन्धित निकायहरूसँग आवश्यक समन्वय गरी विमानस्थलमा सुरक्षा व्यवस्था मजबुत बनाउन माग समेत गरेको छ।
संघले नेपाल सरकारकाे मातहतमा रहेकाे, मलेसियास्थित नेपाली दूतावास तथा मलेसियाली सुरक्षा निकायहरूलाई यस विषयमा विशेष ध्यान दिन आग्रह गर्दै, नेपाली नागरिकको सुरक्षा सुनिश्चित गर्न आवश्यक कदम चाल्न अपिल गरेको छ।
गैरआवासीय नेपाली संघ राष्ट्रिय समन्वय परिषद् मलेसियाले जारी गरेको विज्ञप्तिमा यस्तो गम्भीर विषयमा सबै सरोकारवाला निकायहरूको सहकार्य अपरिहार्य रहेको उल्लेख समेत गरिएको छ।
