काठमाण्डाै । केही महिना अघि अविरल वर्षासँगै आएको बाढीका कारण इलाम जिल्लाका विभिन्न स्थानमा ठूलो जनधनको क्षति पुगेको थियो। उक्त विपद्बाट प्रभावित परिवारहरूलाई सहयोग गर्ने उद्देश्यले गैरआवासीय नेपाली संघ (NRNA) मलेशियाले संयुक्त रूपमा राहत वितरण कार्यक्रम सम्पन्न गरेको छ।
NRNA मलेशिया राष्ट्रिय समन्वय परिषद् तथा मातहतका क्षेत्रीय समिति NRNA मलका राज्य समिति र NRNA जोहोर राज्य समितिको सक्रिय सहकार्यमा आयोजना गरिएको उक्त राहत वितरण कार्यक्रममा इलामकाे माई नगरपालीका वडा नं.५ का बाढीपीडित परिवारहरूलाई करिब १ लाख १० हजार रुपैयाँ बराबरका खाद्यान्न तथा अन्य आवश्यक राहत सामग्री वितरण गरिएको हो। विपद्को पीडाले आक्रान्त आफ्ना देशबासीहरूको दुःखमा मल्हम लगाउने उद्देश्यसहित कार्यक्रम सञ्चालन गरिएको NRNA मलेशियाले जनाएको छ।
विदेशमा रहे पनि मातृभूमिप्रतिको माया, जिम्मेवारी र आपसी सहकार्यको भावनालाई आत्मसात गर्दै गैरआवासीय नेपाली संघ सधैं दुःखीको साथमा उभिने प्रतिबद्धतासहित अघि बढिरहेको संघले स्पष्ट पारेको छ।
“हरेक नेपालीका लागि नेपाली” भन्ने मूल नारालाई आत्मसात गर्दै आपत्–विपत, दुःख–कष्ट र संकटका हरेक घडीमा विदेशमा रहेका नेपालीहरूको साझा संस्थाको रूपमा गैरआवासीय नेपाली संघ भविष्यमा पनि निरन्तर रूपमा मानवीय सेवा र सहयोगका कार्यमा समर्पित रहने प्रतिबद्धता समेत व्यक्त गरिएको छ।
उक्त राहत वितरण कार्यक्रम मलेशियास्थित सम्पूर्ण गैरआवासीय नेपाली संघ मलेशिया परिवारको तर्फबाट NRNA मलेशियाकी महिला उपाध्यक्ष लिला मगरको नेतृत्वमा सम्पन्न गरिएको हो, भने स्थानिय निकाय, सुरक्षाकर्मि, पत्रकार तथा स्थानिय समाजसेबिहरुकाे राेहबरमा राहत बितरण गरिएकाे छ ।
