काठमाडौं । राष्ट्रिय स्वतन्त्र पार्टी (रास्वपा) ले सभापति रवि लामिछानेमाथि लागेको अभियोगको अन्तिम किनारा नलाग्दै उनलाई पुनः पार्टीको मूल जिम्मेवारीमा फर्काउने तयारी गरेको छ।
शुक्रबार उच्च अदालत तुलसीपुरको बुटवल इजलासले लामिछानेलाई थुनामुक्त गर्ने आदेश दिएपछि पार्टीले सो निर्णयप्रति स्वागत जनाउँदै उनलाई तत्काल पार्टी जिम्मेवारीमा फर्काउने संकेत गरेको हो।
कार्यवाहक सभापति डोलप्रसाद अर्यालले जारी गरेको विज्ञप्तिमा अदालतको आदेशको सम्मान गर्दै रास्वपा सधैं ‘विधिको शासन, कानुनी सर्वोच्चता र न्यायिक प्रक्रियाप्रति प्रतिबद्ध’ रहेको उल्लेख गरिएको छ।
विज्ञप्तिमा सभापति लामिछानेमाथि लगाइएका मुद्दाहरू हाल यथावत् रहे पनि ती तत्कालीन निरंकुश सरकारले सुरु गरेको राजनीतिक प्रतिशोधको शृङ्खलाअन्तर्गत रहेको दाबी गरिएको छ। वर्तमान नागरिक सरकारले आवश्यक कदम चाल्दै उक्त प्रतिशोधको शृङ्खलालाई अन्त्य गर्ने विश्वास पार्टीले लिएको विज्ञप्तिमा उल्लेख छ।
‘कानुनी तथा प्रशासनिक प्रक्रिया पूरा गरी सभापति ज्यू तत्काल पार्टीको मूल जिम्मेवारीमा फर्किनुहुने जानकारी गराउन चाहन्छौं,’ विज्ञप्तिमा भनिएको छ।
उच्च अदालतले लामिछानेलाई थुनामुक्त गर्ने आदेश दिए पनि उनीमाथि लागेका अभियोगमा सफाइ भने दिएको छैन। मुलुकी फौजदारी कार्यविधि संहिता, २०७४ अनुसार बैंक जमानतमा बाहिर बसेर मुद्दाको प्रक्रिया सामना गर्ने सुविधा मात्रै प्रदान गरिएको हो।
लामिछानेमाथि सहकारी ठगी, संगठित अपराध तथा सम्पत्ति शुद्धीकरणका आरोपमा विभिन्न अदालतहरूमा मुद्दा चलिरहेका छन्।
यसअघि पनि अभियोग कायमै रहेका बेला प्रहरी अनुसन्धानपछि कास्की जिल्ला अदालतबाट धरौटीमा छुटेपछि उनी पार्टी जिम्मेवारीमा फर्किएका थिए।
