काठमाडौं – देशभित्र विभिन्न विश्वविद्यालय तथा शैक्षिक संस्था सञ्चालनमा रहे पनि शिक्षाका नाममा ठूलो रकम विदेशिने क्रम बढ्दो देखिएको छ। नेपाल राष्ट्र बैंकले सार्वजनिक गरेको चालु आर्थिक वर्षको पहिलो चार महिनाको तथ्यांकअनुसार शिक्षातर्फको व्यय रु ४२ अर्ब ९६ करोड पुगेको छ।
अघिल्लो आर्थिक वर्षको सोही अवधिमा शिक्षातर्फको व्यय रु ३२ अर्ब २२ करोड रहेको थियो। यसअनुसार चालु आर्थिक वर्षको पहिलो चार महिनामै अघिल्लो वर्षको तुलनामा करिब रु १० अर्ब बढी रकम शैक्षिक प्रयोजनका लागि देशबाट बाहिरिएको छ।
नेपाल राष्ट्र बैंकका अनुसार समीक्षा अवधिमा सेवा खाताअन्तर्गत भ्रमण व्यय १६ दशमलव ४ प्रतिशतले वृद्धि भई रु ६४ अर्ब ५९ करोड पुगेको छ। अघिल्लो वर्षको सोही अवधिमा भ्रमण व्यय रु ५५ अर्ब ४९ करोड थियो।
यद्यपि, सेवा खाताअन्तर्गत भ्रमण आय भने समीक्षा अवधिमा ८ दशमलव १ प्रतिशतले वृद्धि भई रु १९ अर्ब १९ करोड पुगेको छ। अघिल्लो वर्षको सोही अवधिमा यस्तो आय रु १७ अर्ब ७६ करोड रहेको थियो।
समग्रमा समीक्षा अवधिमा खुद सेवा आय रु ३२ अर्ब ६८ करोडले घाटामा रहेको छ। अघिल्लो वर्षको सोही अवधिमा खुद सेवा आय रु २३ अर्ब १ करोड घाटामा थियो।
विशेषज्ञहरूले शिक्षाका नाममा बढ्दो विदेशी मुद्रा बाहिरिनु अर्थतन्त्रका लागि चुनौतीपूर्ण बन्दै गएको भन्दै देशमै गुणस्तरीय शिक्षा र अवसर विस्तार गर्नुपर्ने आवश्यकता औंल्याएका छन्।
