काठमाडौं := नेपालसहित विश्वका विभिन्न देशमा प्रदर्शन भैरहेको यस वर्षको बहुप्रतिक्षित र चर्चित फिल्म ‘जेरी अन टप’ को मलेसिया प्रदर्शन मिति पुष्टि गरिएको छ। नेपालमा १२ करोड रूपैयाँभन्दा बढी कारोबार गर्न सफल यो फिल्म आगामी डिसेम्बर पहिलो सातादेखि मलेसियामा रिलिज हुने भएको हो।
गैरआवासीय नेपाली संघ (एनआरएनए) एसिया प्यासिफिक संयोजक तथा मलेसियास्थित व्यवसायी हरि भट्टराईले मलेसियाका लागि फिल्मको प्रदर्शन अधिकार खरिद गरेका हुन्। उनका अनुसार फिल्म डिसेम्बर २ तारिखदेखि मलेसियाका प्रमुख शहरहरूमा बक्स अफिस रिलिज हुने छ।
भट्टराईका अनुसार
“मुख्य शहरहरूमा बक्स अफिस रिलिज गर्ने र नेपालीहरूको उपस्थिति बढि भएका अन्य स्थानहरूमा उपलब्ध माध्यमअनुसार फिल्म प्रदर्शन गर्ने तयारीमा छ।”
हाल मलेसियामा करिब पाँच लाख नेपाली बसोबास गर्दै आएका छन्। उनीहरूले नेपाली चलचित्र तथा कला–संस्कृतिप्रतिको लगाव निरन्तर देखाउँदै आएको उल्लेख गर्दै, यस पटक पनि उनीहरूले त्यही माया र साथ दिने विश्वास भट्टराईले व्यक्त गरेकाछन।
नेपालसँगै अष्ट्रेलिया र अमेरिकामा एकसाथ रिलिज भएको ‘जेरी अन टप’ अहिले यूरोप, मध्यपूर्व लगायतका विभिन्न देशमा प्रदर्शन भैरहेको छ। साथै, यूके, कोरिया र थाइल्यान्डमा पनि प्रदर्शनको तयारी जारी छ।
स्टार अभिनेता अनमोल केसीको करियरकै सबैभन्दा सफल बक्स अफिस फिल्म मानिएको यो चलचित्र अन्तर्राष्ट्रिय बजारमा पनि उच्च मागसहित प्रदर्शन भइरहेको छ।
अनन्या फिल्म्सको ब्यानरमा सरोज न्यौपानेको प्रस्तुतिमा निर्माण गरिएको यस फिल्मको निर्देशन सुयोग गुरुङले गरेका हुन्। फिल्ममा अनमोल केसीसँगै आँचल शर्मा, जसिता गुरुङ, भुवन केसी, केदार घिमिरे, उषा खड्गी, सुरक्षा पन्तलगायतका कलाकारहरूको अभिनय रहेको छ।
