काठमाडौँ — राष्ट्रिय स्वतन्त्र पार्टी (रास्वपा) का उपसभापति डा. स्वर्णिम वाग्लेले निकट भविष्यमा देशको नेतृत्व रास्वपाले सम्हाल्ने दाबी गरेका छन्।
चितवनको सौराहामा शुक्रबारदेखि सुरु भएको पार्टीको विस्तारित बैठकलाई सम्बोधन गर्दै डा. वाग्लेले संघीय निर्वाचनको मिति घोषणा भइसकेकाले अब सबै तहमा निर्वाचन तयारीमा जुट्नुपर्ने बताएका हुन्।
उनका अनुसार अन्तरिम सरकारले आगामी फागुन २१ गते प्रतिनिधि सभा सदस्य निर्वाचनको मिति तोकेको छ। उनले भने,
“संघीय निर्वाचन घोषणा भइसकेको छ। अब हामीले घनिभूत रूपमा तयारी गर्नुपर्छ। करिब १ सय २० दिनभन्दा कम समय बाँकी छ।”
डा. वाग्लेले विचार, योजना र सिद्धान्तमा आधारित भएर जनतालाई प्रेरित पार्दै अघि बढ्नुपर्नेमा जोड दिए।
“हामीले विचार र सिद्धान्तका आधारमा जनतालाई प्रेरणा दिनु छ। अबको केही समयपछि देशको कालखण्डको बागडोर राष्ट्रिय स्वतन्त्र पार्टीले नै सम्हाल्नेछ,” उनले दृढतापूर्वक भने।
उपसभापति वाग्लेले पार्टीका नेता तथा कार्यकर्तालाई आगामी प्रतिनिधि सभा निर्वाचनमा एकजुट भएर लाग्न निर्देशनसमेत दिए। उनका अनुसार रास्वपा अब देशमा सुशासन, विकास र पारदर्शिताको नयाँ अध्याय सुरु गर्न तयार छ।
