काठमाडौं — नेपालका प्रमुख वामपन्थी दलहरूबीच आज ऐतिहासिक एकता घोषणा हुँदैछ। नेकपा (माओवादी केन्द्र), नेकपा (एकीकृत समाजवादी) सहितका नौ वाम घटकबीच हुने एकता घोषणा सभा काठमाडौंको भृकुटीमण्डपमा आयोजना गरिएको छ।
एकतापछि बन्ने नयाँ पार्टीको नाम ‘नेपाली कम्युनिष्ट पार्टी’ रहने र चुनाव चिन्ह पाँच कुने तारा हुने सहमति भएको छ। साथै, एकीकृत दलहरूले अबको ६ महिनाभित्र एकता राष्ट्रिय महाधिवेशन आयोजना गर्ने निर्णय गरेका छन्।
एकीकृत पार्टीको नेतृत्वमा पुष्पकमल दाहाल ‘प्रचण्ड’ संयोजक र माधवकुमार नेपाल सह–संयोजक हुने सहमति गरिएको छ। पार्टीको मार्गदर्शक सिद्धान्त मार्क्सवाद र लेनिनवाद हुने पनि उल्लेख गरिएको छ।
एकता प्रक्रियामा सहभागी वाम घटकहरूमा —
नेकपा (माओवादी केन्द्र)
नेकपा (एकीकृत समाजवादी)
नेपाल समाजवादी पार्टी
नेकपा (समाजवादी)
जनसमाजवादी पार्टी, नेपाल
नेपाल कम्युनिष्ट पार्टी
नेकपा (माओवादी समाजवादी)
नेकपा (साम्यवादी)
र गोपाल किराँती नेतृत्वको देशभक्त समाजवादी मोर्चा
लगायतका समूह सहभागी छन्।
माओवादी केन्द्रको मंगलबार बसेको महाधिवेशन आयोजक समितिको बैठकले एकता सम्बन्धी निर्णयलाई अनुमोदन गरेको थियो।
एकता घोषणा सभाअघि भृकुटीमण्डप क्षेत्रमा जनप्रदर्शन र शक्ति प्रदर्शन गर्ने तयारी गरिएको छ।
यसअघि आइतबार माओवादी केन्द्र र एकीकृत समाजवादीसहितका आठ वाम घटकले एकता सहमति पत्रमा हस्ताक्षर गरेका थिए। त्यसपछि गोपाल किराँती नेतृत्वको देशभक्त समाजवादी मोर्चा पनि औपचारिक रूपमा एकता प्रक्रियामा सहभागी भएको हो।
