वैकल्पिक गोलरक्षक अञ्जना रानामगर टाइब्रेकरमा चम्किएपछि बुधबार नेपाली राष्ट्रिय महिला फुटबल टोलीले अन्तर्राष्ट्रिय मैत्रीपूर्ण खेलमा भारतलाई ३–० ले हराएको छ । दुई दिनको अन्तरमा नेपालले भारतमाथि दोस्रोपटक जित निकालेको हो । समग्रमा २० अन्तर्राष्ट्रिय भारतविरुद्धको खेलमा नेपालले पाँचौँपटक सफलता प्राप्त गरेको हो । गत सोमबार पनि नेपालले त्रिकोणात्मक मैत्रीपूर्ण फुटबलमा भारतलाई २–१ ले पाखा लगाएको थियो ।
सिक्किमको पाल्जोर रंगशालामा निर्धारित समयको खेल १–१ को बराबरीमा सकियो । त्यसपछि खेलको छिनोफानो टाइब्रेकरबाट हुँदा नेपालकी गोलरक्षक रानामगरले भारतका दुई प्रहार छेक्दै जित दिलाइन् । नेपालको चारमध्ये तीन गोल भएको थियो । भारतीय तीनजना खेलाडी पेनाल्टीमा चुके । नेपालको जितमा सविता रानामगर, रश्मिकुमारी घिसिङ र निशा थोकरको प्रहार गोल भएको थियो । नेपालकी कप्तान अनिता बस्नेतको प्रहार बाहिरियो । भारतका प्रिया दर्शनी र अष्टम ओरामको पेनाल्टी प्रहार रानामगरले रोकिन् । भारतकी सन्तोषको प्रहार बाहिरिएको थियो ।
नेपालका प्रशिक्षक नवीन न्यौपानेले सोमबार भारतविरुद्ध खेलेका १० खेलाडीलाई सिक्किममा विश्राम दिएका थिए । भारतले पनि पहिलो एघारमै नयाँ खेलाडीलाई अवसर दिएको थियो । प्रशिक्षक न्यौपानेले ९० मिनेटपछिको इन्जुरी समयमा गोलरक्षक उषा नाथको स्थानमा अञ्जनालाई मैदान छिराएका हुन् । उषाले सन् २०१९ पछि पहिलोपटक खेल्ने अवसर पाएकी हुन् । यसअघि सिलोङमा भएको अन्तर्राष्ट्रिय खेलमा नेपाल इरानसँग ३–० ले पराजित भएको थियो । सो खेलमा नेपाल उपविजेता हुँदा इरान च्याम्पियन भएको थियो । एन्फाको प्रतियोगिता आयोजना समितिका संयोजक सञ्जीव मिश्रका अनुसार भारतविरुद्ध भएको दोस्रो खेल पनि अन्तर्राष्ट्रिय मान्यता प्राप्त खेल हो ।
भारतको सुरुवाती अग्रता
घरेलु मैदानमा भारतले खेलको ३०औँ मिनेटमा १–० को अग्रता लियो । नेपाली डिफेन्डर निशा थोकरको गल्तीमा सौम्या गुगुलोथले भारतलाई १–० को अग्रता दिलाइन् । सौम्यको सटीक प्रहारलाई गोलरक्षक उषाले रोक्न सकिनन् । पहिलो हाफको इन्जुरी समयमा नेपालले बराबरी गोल फर्कायो । रश्मिकुमारी घिसिङले नेपाललाई १–१ को बराबरीमा ल्याइन् । उनले कप्तान अनिता बस्नेतको कर्नरलाई हेडिङ गोल गरिन् । भारतविरुद्ध उनको यो दोस्रो गोल हो । यसअघि सन् २०२२ मा उनले भारतविरुद्ध विजयी गोल गरेकी थिइन् ।
नेपाल र भारतले गरे नयाँ खेलाडी प्रयोग
भारतसँगको मैत्रीपूर्ण खेलमा प्रशिक्षक न्यौपानेले १० नयाँ खेलाडीलाई मौका दिएका थिए । अघिल्लो खेलमा भारतसँग प्रतिस्पर्धा गरेका ११ मध्ये एक खेलाडीलाई निरन्तरता दिँदै न्यौपानले १० खेलाडीलाई मौका दिएका हुन् । भारतले पनि नेपालविरुद्ध नयाँ सेट खेलाएको थियो । सोमबार प्रतिस्पर्धा गरेका ११ जना खेलाडीलाई भारतीय प्रशिक्षकले विश्राम दिए । भारतले पूरै युवा खेलाडीलाई प्रतिस्पर्धा गराएको थियो । भारतविरुद्ध नेपालको कप्तानी मिडफिल्डर अनिता बस्नेतले गरिन् । दोस्रो हाफमा आफूभन्दा सिनियर रेनुका नगरकोटेबाट उनले कप्तानी आर्मब्यान्ड लगाएकी थिइन् ।
नियमित कप्तान सावित्रा भण्डारीसहित गोलरक्षक अञ्जिला तुम्बाप्पो सुब्बा र मिडफिल्डर प्रीति राईले भारतविरुद्ध खेलेनन् । तीनजना खेलाडी वैदेशिक खेलका लागि भारतबाटै आ–आफ्नो क्लबमा आबद्ध भएका थिए । भारतविरुद्ध पूर्णिमा राईले डेब्यु गरिन् । डिफेन्डरमा हिराकुमारी भुजेल, निशा ठोकर, विमला विक र प्रतीक्षा चौधरीले भारतविरुद्ध खेले । विमलाबाहेक सबै खेलाडीले टोलीमा पुनरागमन गरेका हुन् । यता, मिडफिल्डमा कप्तान अनिता र पूर्णिमासहित सरु लिम्बू र सरस्वती हमालले अवसर पाए । यसअघि खेलेका सविता रानामगर र पूर्वकप्तान रेनुका नगरकोटीले दोस्रो हाफमा प्रतिस्पर्धा गरिन् ।
पहिलो हाफमा मौका गुमाए : नवीन न्यौपाने, प्रशिक्षक, नेपाल
भारतसँगको प्रतिस्पर्धामा पहिलो हाफमा उत्कृष्ट प्रदर्शन गरेका थियौँ । तुलनात्मक रूपमा दोस्रो हाफमा त्यति पोस्ट चार्ज गर्न सकेनौँ । पहिलो हाफमा नेपालले सातवटा गोल अवसर गुमाएको थियो । नयाँ सेटको भारतले एक मौकामा हामीविरुद्ध गोल गर्यो । पहिलो हाफमा भारत र दोस्रोमा नेपालले बल पोसेसन बनाएको थियो । पेनाल्टीमा भारतको सुरुवातमै असफल प्रहार भएपछि हाम्रा खेलाडीमा कन्फिडेन्स बढ्यो । अझ गोलरक्षक अञ्जनाले दुई पेनाल्टी छेक्दा नेपालको जित पक्का भयो । नेपाली महिला खेलाडीले यस किसिमको एक्सपोजर पाउँदा आगामी दिनमा योभन्दा राम्रो नतिजा निकाल्न सकिन्छ ।
बंगलादेशको नासरिनमा पूजा अनुबन्ध
नेपाली राष्ट्रिय महिला फुटबल टोलीकी डिफेन्डर पूजा रानाले बंगलादेशी क्लब नासरिन स्पोर्टस् एकेडेमीसँग सम्झौताग गरेकी छिन् । बंगलादेशी क्लब नासरिनले बुधबार दक्षिण एसियाली फुटबल महासंघ (साफ) महिला क्लब च्याम्पियनसिपका लागि पहिलो विदेशी खेलाडीका रूपमा पूजालाई अनुबन्ध गरेको जनाएको छ । पूजाको यो दोस्रो विदेशी क्लब हो । यसअघि उनले भुटानको ट्रन्सपोर्ट युनाइटेडबाट खेलेकी थिइन् ।
पहिलोपटक आयोजना हुन लागेको साफ महिला च्याम्पियनसिप नेपालमै आगामी ५ देखि २० डिसेम्बरसम्म हुँदै छ । प्रतियोगितामा नेपालको एपिएफ, भारतको इस्ट बंगाल, भुटानको ट्रान्सपोर्ट युनाइटेड, पाकिस्तानको कराँची सिटी र बंगलादेशको नासरिन स्पोर्टस् एकेडेमीको सहभागिता रहनेछ । श्रीलंका र माल्दिभ्सले सहभागिता जनाएका छैनन् । पूजाले विभागीय टोली नेपाल पुलिस क्लबबाट घरेलु प्रतियोगिता खेल्दै आएकी छिन् ।
