अर्थमन्त्री रामेश्वर खनालले सर्वसाधारणका गुनासो सिधै सुन्न र समाधान गर्न सुरु गरेको ‘गुनासो इमेलबक्स’ संयन्त्र प्रभावकारी देखिएको छ।
मन्त्री खनालले मंगलबार यो संयन्त्र सुरु भएको ६ घण्टामै १६६ वटा इमेल प्राप्त भएको जानकारी दिँदै अब समस्या समाधानका लागि सिंहदरबार धाउनुपर्ने बाध्यता अन्त्य गर्ने लक्ष्य रहेको बताएका छन्।
मन्त्री खनालले मंगलबार सामाजिक सञ्जालमार्फत यसबारे जानकारी दिएका हुन्। अर्थ मन्त्रालयको ‘गुनासो मेलबक्स’ र आफ्नो आधिकारिक इमेलमा गरी करिब ६ घण्टाको अवधिमा १६६ वटा इमेल प्राप्त भएको उनले उल्लेख गरेका छन्।
‘प्राप्त इमेलमध्ये करिब दुई दर्जनको जवाफ दिइसकेको छु र अधिकांशमा कारबाही अघि बढाइएको छ,’ खनालले लेखेका छन्, ‘बाँकी इमेलहरूको पनि यथासम्भव छिटो जवाफ दिइनेछ।’
यसले सर्वसाधारण तथा विभिन्न संस्थाहरूले आफ्ना समस्या समाधानका लागि व्यक्तिगत रूपमा सिंहदरबारसम्म धाउनुपर्ने झन्झट र बाध्यतालाई हटाउने विश्वास मन्त्री खनालले व्यक्त गरेका छन्।
