काठमाडौं । नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टी (नेकपा)को स्थायी कमिटी बैठक बोलाइएको छ ।
आइतबार दिउँसो ३ बजेका लागि बोलाइएको बैठकमा केन्द्रीय कमिटी बैठकको तयारी, नेकपा (माओवादी केन्द्र)को एकता प्रस्तावसहित विषयमा छलफल हुने विप्लवको सचिवालयले जनाएको छ ।
यसअघि, साउन १९ गते माओवादी केन्द्रको स्थायी कमिटी बैठकले विप्लवसँग एकता गर्ने निर्णय गरेको थियो ।
तर, विप्लवको पार्टीमा नेताहरूबीच एकतालाई लिएर एकमत बनिसकेको छैन । विप्लवको पार्टीका प्रवक्ता खड्गबहादुर विश्वकर्मा ‘प्रकाण्ड’ले आफूहरूको जनमत बढेकाले एकताको विषय सोचनीय रहेको बताए ।
“हाम्रो पार्टीको नीति, सिद्धान्त पहिलेको तुलनामा फेरिएको छ । पार्टीलाई लिएर जनमत राम्रै बन्दै छ । अहिलेकै अवस्थामा एकताको विषय सोचनीय छ,” उनले भने ।
पार्टीभित्रका नेताकार्यकर्ताको धारणा बुझेर आवश्यक निर्णय लगिने उनको भनाइ छ ।
विप्लव नेतृत्वको नेकपाको पोलिटब्युरो बैठक यही भदौ १८ गते र केन्द्रीय कमिटी बैठक भदौ २२ गतेका लागि तय गरिएको छ ।
