काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले रूपन्देही–३ को उपनिर्वाचनका उमेदवारका नौ आकांक्षीलाई कारागार बोलाएर भेटेका छन् । बुटवलको सुप्रिम सहकारी ठगी तथा संगठित अपराधमा पुर्पक्षका लागि नक्खुु कारागारमा रहेका लामिछानेले आइतबार नौ आकांक्षीलाई कारागारमा डाकेर क्रमबद्ध रूपमा भेटेका हुन् । भेटमार्फत उनले उमेदवारहरूबीच इगो नबढोस् भनेर सम्झाएका छन् ।
साथै, उनले अहिले एकजनाले अवसर पाए पनि ०८४ मा सबैलाई अवसर दिने आश्वासन दिएका छन् । “नौजना मध्येबाट हामी एकजना चुनावमा जाँदैछौँ । उहाँलाई कतैबाट असहयोग नहोस्, अब त डेढ वर्ष त बाँकी छ तपाईंहरू नौजनालाई सेटल गर्न कहीँ कतै कुनै कसर बाँकी राख्नेछैन,” भेटपछि लामिछानेको भनाइ उद्धृत गर्दै आकांक्षीमध्येका सुलभ खरेलले भने, “अलिकति पनि गुनासो गर्ने ठाउँ मैले दिइन भनेर उहाँ (रवि लामिछाने)ले भन्नुभयो ।”
रास्वपाले आजै सचिवालय बैठकबाट रूपन्देही–३ का लागि उमेदवारको नाममा निर्णय गर्ने छ । त्यसका लागि सहमहामन्त्री विपीन आचार्यको संयोजकत्वको छनोट समितिले गरेको निर्णय सचिवालयले अनुमोदन मात्र गर्ने महामन्त्री कवीन्द्र बुर्लाकोटीले जानकारी दिए । “सबै निर्णय विभिन्न विधामा पाएको नम्बरका आधारमा सहमहामन्त्री विपीन आचार्यको टिमले गरेअनुसार नै हुनेछ,” महामन्त्री बुर्लाकोटीले बाह्रखरीसँग भने, “सचिवालयले त्यहाँबाट सबै नम्बर जोडेर भएको निर्णयलाई अनुमोदन मात्र गर्ने हो ।”
दिउँसो १ः३० बजेका लागि बोलाएको बैठक छनोट समितिले नै तयारी पूरा नगरेका कारण २ः३० बजेका लागि सारिएको थियो । स्रोतका अनुसार, छनोट समितिलाई उपयुक्त उमेदवार सुलभ खरेल हुने सभापति लामिछानेले दिइसकेका छन् ।
