चीनका राष्ट्रपति सी चिनफिङले लिपुलेकलाई लिएर भारत र नेपालबीच रहेको सीमा विवादमा आफूहरु पक्ष बन्न नचाहेको बताएका छन्।
चीनको तिन्जियानमा शनिबार प्रधानमन्त्री केपी शर्मा ओलीसँग भएको द्वीपक्षीय वार्तामा लिपुलेकबारे भारत र चीनले हालै गरेको सहमतिबारे नेपालले असहमति जनाएपछि उनले यस्तो प्रतिक्रिया जनाएका हुन्।
सीसँगको भेटमा प्रधानमन्त्री ओलीले सुगौली सन्धि अनुसार महाकाली नदीको पूर्वतर्फका सबै भूभागहरू नेपालका रहेको भन्दै यस मामिलामा चीनले नेपाललाई सहयोग गनुपर्ने मत राखेका थिए।
‘सन् १८१६ को सुगौली सन्धिले नेपालको सीमा निर्धारण गरेको हो। त्योअनुसार महाकालीपूर्वका सबै भूभागहरु नेपाली भूभाग हुन्। नेपालका सार्वभौम भूभाग हुन् नेपालका । लिपुलेकको त्यो भूभाग प्रयोग गर्ने गरी भएको जुन सम्झौता छ, त्यो हुन हुँदैनथ्यो। चीन सरकारले त्यस सम्झौलाई पालना नगरोस्,’ प्रधानमन्त्री ओलीको भनाइ उद्धृत गर्दै भेटवार्तापछि परराष्ट्र मन्त्रालयका सचिव अमृतबहादुर राईले भने, ‘त्यस सम्झौताका सम्बन्धमा नेपालको आपत्ति छ भन्ने स्पष्ट आफ्नो धारणा राख्नुभयो।’
परराष्ट्र सचिव राईका अनुसार सीले यसको जवाफ दिएका थिए। उनका अनुसार राष्ट्रपति सीले मुख्यगरी दुई कुरा आफ्नो जवाफमा उल्लेख गरेका थिए। पहिलो, उनले यो विषय नेपाल र भारतको मामिला भएको भन्दै आफूहरु यसको पक्ष नबन्ने प्रष्ट पारेका थिए।
अर्को, नेपालको दाबीविरुद्ध आफूहरुले भारतसँग सम्झौता नगरेको समेत उल्लेख गरेका थिए। ‘परम्परागतरुपमा यो नाका प्रयोग हुँदै आएको हो तर तपाईंहरूको जुन सीमा विवाद हो, त्यसमा हामी पक्ष बन्न चाहँदैनौँ,’ चिनियाँ राष्ट्रपतिको भनाई उल्लेख गर्दै राईले भने, ‘तपाईंहरुले दुई पक्षले समाधान गर्ने विषय हो। नेपालको दाबीमा हाम्रो कुनै सम्झौता होइन भन्ने कुरा तपाईंहरुले बुझिदिनुहोला भन्ने खालको उहाँको प्रतिउत्तर थियो।’
