मधेस प्रदेशका मुख्यमन्त्री सतिशकुमार सिंह एक साताको भ्रमणका लागि मलेसिया प्रस्थान गरेका छन्। उनी वैदेशिक रोजगारीमा रहेका नेपाली कामदार, विशेषतः मधेस प्रदेशका नागरिकहरूसँग प्रत्यक्ष भेटघाट गर्ने उद्देश्यले मलेसिया आइपुगेका हुन्।
मुख्यमन्त्री सिंहले मलेसियामा कार्यरत नेपाली कामदारहरूको अवस्था, समस्या र अनुभवबारे जानकारी लिने र आवश्यक पहल गर्ने कार्यक्रमहरूमा सहभागिता जनाउने सचिवालयले जानकारी दिएको छ। मधेस प्रदेश सरकारका अनुसार, सिंहको भ्रमणले वैदेशिक रोजगारमा रहेका नागरिकहरूको वास्तविक अवस्था बुझ्न र तिनको हकहितमा काम गर्न महत्त्वपूर्ण भूमिका खेल्नेछ।
यही सन्दर्भमा, गैर आवासीय नेपाली संघ (NRNA) राष्ट्रिय समन्वय परिषद् (NCC) मलेसिया द्वारा आयोजित विशेष सांगीतिक साँझ कार्यक्रममा पनि प्रमुख अथितिकाे रुपमा मुख्यमन्त्री सिंहको सहभागिता रहनेछ। कार्यक्रमका लागि नेपालबाट चर्चित कलाकारहरूको टोली मलेसिया प्रस्थान गरिसकेको छ ।
कार्यक्रम Hotel Grand Continental, Kuala Lumpur, Malaysi मा मिति: २३ अगष्ट २०२५ कादिन साँझ ६ बजेदेखि १० बजे सम्म रहनेछ ।
यस विशेष सांगीतिक कार्यक्रममा नेपालकी चर्चित गायिका अञ्जिला रेग्मी, मिसेल घिमिरे, बार्सा राई लगायतका कलाकारहरूले धमाकेदार प्रस्तुति दिनेछन्। कार्यक्रम हरितालिका तीज २०८२ को अवसरमा आयोजना गरिएको हो, जसले मलेसियामा कार्यरत नेपाली समुदायलाई मनोरञ्जन र सामाजिक मेलमिलापको अवसर प्रदान गर्नेछ।
मुख्यमन्त्री सिंहको अनुपस्थितिमा भौतिक पूर्वाधार विकासमन्त्री सरोजकुमार यादवलाई कार्यवाहक मुख्यमन्त्रीको जिम्मेवारी दिइएको प्रदेश सरकारले जनाएको छ।
