मलेसिया – मलेसियाको कुचिङ शहरमा सम्पन्न १०औं एसियाली पारा तेक्वान्दो च्याम्पियनसिप (G-4) मा नेपालकी पारा तेक्वान्दो खेलाडी पलेशा गोवर्धन ले महिला ५७ केजी तौल समूह अन्तर्गत K-44 वर्गमा कास्य पदक जित्दै देशको नाम उज्यालो पार्न सफल भएकी छन्। 
पलेशाको यो सफलता उनको छैठौं आधिकारिक अन्तर्राष्ट्रिय पदक हो, जुन उपलब्धि नेपाली पारा खेलकुद क्षेत्रका लागि अत्यन्त गौरवको विषय बनेको छ।
प्रतियोगितामा नेपालको टोलीलाई राष्ट्रिय खेलकुद परिषद्का बोर्ड सदस्य तथा नेपाल तेक्वान्दो संघका सदस्य रामचन्द्र श्रेष्ठ को नेतृत्वमा व्यवस्थापन गरिएको थियो। प्रशिक्षणको जिम्मेवारी पारा तेक्वान्दो प्रशिक्षक कविराज नेगी लामाले सम्हाल्नुभएको थियो।
पलेशासँगै नेपालबाट भरत सिंह महता, अमीर भ्लोन, रेनु तामाङ र कामना प्रसाईं लगायतका खेलाडीहरूले पनि प्रतियोगितामा सहभागिता जनाएका थिए।
यस गौरवमय उपलब्धिप्रति हिमालयन एकेडेमी तथा नेपाली फुटबल एसोसिएसन मलेसिया परिवारले पलेशा गोवर्धनलाई हार्दिक बधाई ज्ञापन गर्दै भविष्यमा अझ उत्कृष्ट सफलता हासिल गर्न शुभकामना व्यक्त गरेका छन्।
