काठमाडौं । मंसिर १६ मा हुने स्थानीय तहको उपनिर्वाचनका लागि दलहरुले तयारी तीव्र पारेका छन् । निर्वाचन आयोगले कार्यतालिका सार्वजनिक गरेदेखि नै आन्तरिक तयारी थालेका दलहरु अहिले उम्मेदवार टुंगो लगाउने चरणमा पुगेका हुन् ।
सरकारमा रहेका मुख्य दुई दल नेकपा एमाले र नेपाली कांग्रेस एक्ला एक्लै प्रतिस्पर्धाको तयारीमा छन् । प्रमुख प्रतिपक्षी नेकपा माओवादी केन्द्रले चुनावी गठबन्धनको विकल्प खुला राखेको छ । राष्ट्रिय स्वतन्त्र पार्टी पहिलो पटक स्थानीय तहको चुनावमा भाग लिने तयारीमा छ । दलहरुले उपनिर्वाचनलाई आफ्नो शक्ति परीक्षणको रुपमा लिएका छन् ।
मंसिर १६ गते ३३ जिल्लाका स्थानीय तहका ४४ पदाधिकारीका लागि उपनिर्वाचन गर्न लागिएको हो । ४४ पदमध्ये २ जिल्ला सम्वन्वय समितिका प्रमुखको उपनिर्वाचन हुने छ । स्थानीय तहका ४२ पद मध्ये एक नगरपालिका प्रमुख र दुई गाउँपालिका अध्यक्ष लागि निर्वाचन हुनेछ । बाँकी पद उपप्रमुख, उपाध्यक्ष तथा वडाअध्यक्षका छन् ।
उपनिर्वाचनका लागि दलहरुले उम्मेदवार छनोटदेखि आफ्ना चुनावी कार्यक्रम तय गर्न सुरु गरिसकेका छन्। नेपाली कांग्रेसले महामन्त्री विश्वप्रकाश शर्माको संयोजकत्वमा स्थानीय तहको उपनिर्वाचन संयोजन समिति गठन गरेको छ । उसले उमेदवार छनोटको प्रक्रिया पनि सँगसँगै अघि बढाएको छ । एमालेसँग सरकारमा सहकार्य गर्दै आएको कांग्रेसले उपनिर्वाचनमा भने कुनै पनि दलसँग गठबन्धन बनाउने छैन ।
संघीय सरकारको नेतृत्व गरिरहेको नेकपा एमालेले पनि उपनिर्वाचनमा अन्य दलसँग सहकार्य गर्ने छैन । एमालेले कार्यतालिका नै तोकेर उम्मेदवार सिफारिस गर्न लगाएको छ ।
२०७४ र २०७९ सालको निर्वाचनमा कुनै न कुनै दलसँग सहकार्य गर्दै आएको माओवादी केन्द्रले यो उपनिर्वाचनमा पनि सहकार्यको ढोका खुलै राखेको छ । तर कुन दलसँग सहकार्य गर्ने भन्ने टुंगो लगाएको छैन । उम्मेदवार छनोटको प्रक्रिया भने माओवादी केन्द्रले सुरु गरिसकेको छ ।
यता राष्ट्रिय स्वतन्त्र पार्टी पहिलो पटक यही उपनिर्वाचनमार्फत् स्थानीय तहको निर्वाचनमा भाग लिँदैछ । यस्तै एकीकृत समाजवादी, जनता समाजवादी पार्टी नेपाल, जनता समाजवादी पार्टीलगायतले पनि उपनिर्वाचनमा भाग लिँदैछन्। स्थानीय तह निर्वाचन प्रयोजनका लागि २५ राजनीतिक दल निर्वाचन आयोगमा दर्ता भएका छन् ।
