१० कार्तिक,सुखड । कैलालीको घोडाघोडी नगरपालिका–३ निम्दीमा घोडाघोडी नगर कप क्रिकेट प्रतियोगिता–२०८१ सुरु भएको छ । ‘व्यक्तित्व विकास पारस्परिक सहयोग,राष्ट्र र स्वास्थ्यका लागी खेलकुद’ भन्ने मूल नाराका साथ प्रतियोगिता सुरु भएको छ । वीरेन्द्र स्पोर्ट एकेडेमीका अध्यक्ष राजन मल्लको सभाध्यक्षमा भएको कार्यक्रममा प्रमुख अतिथि नगर प्रमुख खडक बहादुर रावत रहेका थिए ।
प्रतियोगिताको उद्घाटन गर्दे नगर प्रमुख रावतले गाउँ गाउँमा रहेको खेलाडीहरूको प्रतिभा एवम् कला देखाउन यस्ता प्रतियोगिता आवश्यक रहेको बताए । पालिकाले जुन सुकै खेल विद्याको क्षेत्रमा भौतिक,नैतिक र आर्थिक सहयोग रहँदै आएको उनले बताए । अतिरिक्त क्रियाकलाप र खेलकुद क्षेत्रमा मै देशको पहिलो नगरपालिका स्थापित हुन सफल भएको उनको भनाई थियो । यस्ता खेलहरूले युवा वर्गको स्फूर्ति बढ्नुका साथै मनोरञ्जन पनि हुने उनको धारणा रहेको थियो ।
प्रतियोगितामा ८ टिमको सहभागिता रहेको छ । प्रतियोगितामा पहिलो हुने टिमले २५ हजार नगद सहित ट्रफी र प्रमाणपत्र प्राप्त गर्ने छ भने दोस्रो स्थान हासिल गर्ने टिमले नगद १० हजार सहित ट्रली र प्रमाणपत्र प्राप्त गर्ने छन् । खेल निम्दीमा रहेको सरस्वती आधारभूत विद्यालयको खेल मैदानमा सञ्चालन भइरहेको छ ।
कात्तिक १० गते बाट सुरु भएको खेल १७ गते समापन हुने आयोजक संस्था वीरेन्द्र स्पोर्ट एकेडेमीले जनाएको छ । कार्यक्रममा वडा नम्बर ९ का वडा अध्यक्ष हरिस चन्द्र शाह, वडा नम्बर ३ का कार्यवाहक वडा अध्यक्ष रमेश कुमार चौधरी लगायत विभिन्न व्यक्तिहरूको सहभागिता रहेको थियो । कार्यक्रमको सञ्चालन प्रशान्त क्षेत्रीले गरेका थिए ।
