काठमाडौँ । आफूलाई सामाजिक अभियान्ता बताउने युवराज सफलले फेरि राष्ट्रिय स्वतन्त्र पार्टीका सभापति रवि लामिछानेसहित ७ जनाविरुद्ध गृह मन्त्रालयमा उजुरी दिएका छन् । सफल केही समय अघि राष्ट्रिय स्वतन्त्र पार्टीका सभापति लामिछानेविरुद्ध सर्वोच्च अदालतमा मुद्दा हालेर चर्चामा आएका थिए ।
प्रतिनिधि सभाका उपसभामुख इन्दिरा रानासहित सात जना विरुद्ध गृह मन्त्रालयमा उनले बुधबार उजुरी दिएका हुन् । सफलले उपसभामुख रानासँगै सांसदहरू रवि लामिछाने, डीपी अर्याल, धनराज गुरुङ, शक्ति बस्नेत, योगेश भट्टराई र ऋषिकेश पोखरेलविरुद्ध गृह मन्त्रालयमा उजुरी दिएका हुन् ।
उजुरी दिएकामध्ये लामिछाने रास्वपाका सभापति, अर्याल उपसभापति हुन भने धनराज नेपाली काँग्रेसका उपसभापति हुन् । त्यस्तै बस्नेत माओवादी केन्द्रका उपमहासचिव हुन् । भट्टराई र पोखरेल एमालेका सांसद हुन् ।
