काठमाडौं । विश्वभरका इथिकल ह्याकरहरूको प्रतिस्पर्धा ‘क्याप्चर द फ्ल्याग’ (सीटीएफ) मा नेपालका पाँच जना ह्याकर छनोट भएका छन् । २ सेप्टेम्बरमा १५ सय टिमबिच अनलाइनमा भएकाे क्वालिफायर राउन्डमा ३७ औं स्थानमा परेर नेपाली ह्याकरको समूह ‘ह्याक एट सेक’ फाइनल चरणका लागि छनोट भएको हो ।
सीटीएफ इथिकल ह्याकरहरूबिच हुने प्रतिस्पर्धा हो, जसकाे आयोजनाका लागि ब्ल्याक ह्याट एमईए (मिडल इस्ट एन्ड अफ्रिका) नामक संस्थाले साउदी फेडेरेसन फर साइबर सेक्युरिटी एन्ड प्रोग्रामिङ (एसएएफसीएसपी) र फ्ल्यागयार्डसँग सहकार्य गरेकाे छ । अन्तिम चरणको प्रतिस्पर्धाका लागि विश्वभरबाट १,००० बढी टिमका ५,३०० बढी ह्याकर सहभागी भएका थिए । त्यसबाट २०० टिम छनोट भएका छन् । अब २५० टिमका हजारभन्दा बढी ह्याकरसँग पाँच नेपाली ह्याकरले प्रतिस्पर्धा गर्नेछन् ।
नेपाललाई प्रतिनिधित्व गर्दै अन्तिम चरणमा छनोट भएको टिम ‘ह्याक एट सेक’ (Hack@Sec) मा विशाल अर्याल, प्रशान्त श्रेष्ठ, रोमियो कार्की, अनिश भट्टराई र प्रदीप भट्टराई रहेका छन् । टिम लिडर विशाल अर्यालका अनुसार यस प्रतिस्पर्धामा सहभागी हुन भिजाका लागि आवेदन दिई सकेका छौं । “हामीले भिजाका लागि अप्लाइ गरिसकेका छौं । छिट्टै आउँछ होला,” टेकपानासँग कुरा गर्दै अर्यालले सुनाए ।
प्रतिस्पर्धाको फाइनल २६ देखि २८ नोभेम्बरमा साउदी अरेबियाको ‘रियाद एक्जिबिसन एन्ड कन्भेन्सन सेन्टर’मा हुनेछ । “पहिलेको भन्दा यसपालि धेरै राम्रो भएको छ । हाम्रो मनोबल बढेको छ । जित्ने सम्भावना पनि उच्च छ,” अर्यालले अगाडि भने, “हामी पहिले ८६ औं स्थानमा परेका थियौं । अहिले ३७ औं वरियतामा परेका छौं । यो हाम्रा लागि धेरै खुसीको कुरा हो ।”
प्रतिस्पर्धाका दौरान छनौट भएका सम्पूर्ण ह्याकरको टिमलाई आयोजकले विभिन्न सिस्टम उपलब्ध गराएको हुन्छ । र, उनीहरूले त्यही सिस्टमका कमजोरी पत्ता लगाएर ‘सीटीएफ’ सङ्कलन गर्नुपर्ने हुन्छ । जसले सबैभन्दा बढी सीटीएफ पोइन्ट सङ्कलन गर्यो, उ नै विजेता बन्नेछ ।
विजेताले पुरस्कार स्वरूप साढे सात लाख साउदी रियाल (करिब दुई करोड ६७ लाख रुपैयाँ) पाउनेछन् । “छनाेट चरणमा पनि हामीलाई विभिन्न सिस्टम दिइएका थिए, त्यसमा कमजोरी पत्ता लगाएर सीटीएफ पोइन्ट कलेक्ट गर्नुपर्ने थियो,” उनले भने, “यदि विश्वको शीर्ष १० मा परेको भए हाम्रो उडान खर्च र बस्ने खर्च आयोजकले नै ब्यहोर्ने थियो । तर, हामी शीर्ष ३७ मा परेकाले फाइनलमा सहभागी हुन पायौं । यसमा अन्य खर्च आफैंले व्यहोर्नुपर्ने हुन्छ ।”
यसका लागि टिमले अहिले प्रायोजक (स्पोन्सर) खोजिरहेको छ । नेपालमा ईस्पोर्टलाई प्रवर्द्धन गर्न सरकारी निकाय पछि रहेको उनको गुनासो छ । अर्यालले अगाडि भने, “नेपालीहरू ठुला ठुला ह्याकिङ प्रतिस्पर्धामा सहभागी भइरहेका हुन्छन् । तर, यसलाई प्रवर्द्धन गर्न गाह्रो भइरहेको छ । सरकारी स्तरबाट नै ईस्पोर्सट्सलाई सहयोग हुन जरुरी छ ।”
साइबर सुरक्षामा रुचि राख्ने हजारौं मानिसहरू माझ यो टिम प्रतिस्पर्धा गर्दैछ । साइबर सुरक्षाको क्षेत्रमा नेपाललाई प्रतिनिधित्व गर्न जानु गौरवको विषय भएको उनी सुनाउँछन् । “भिजुअल वा अन्य रूपमा हामीलाई प्रायोजन गर्नेहरूको प्रचार गरिदिन सक्छौं । यति ठुलो कार्यक्रममा छनौट हुनु र देशको प्रतिनिधित्व गरेर जानु आफैंमा सम्पूर्ण नेपालीका लागि खुसीको कुरा हो । यसले आगामी पुस्तालाई पनि इथिकल ह्याकिङमा सक्रिय हुन प्रेरित गर्छ,” अर्याल थप्छन् ।
टिम ‘ह्याक एट सेक’लाई प्रयोजन गर्न ईमेल गर्न ([email protected]) अथवा यहाँ क्लिक गरी लिङ्क्डइनमा जोडिन जोडिएर सम्पर्क गर्न सकिनेछ ।
