मलेसिया : अछामका एक युवकको मलेसियामा निधन भएको छ। रोजगारीको सिलसिलामा मलेसियामा रहेका मेल्लेख गाउँपालिका-७ का भक्त साउँदको निधन भएको हो।
४० वर्षीय साउँद काम सकेर कोठामा सुतेका थिए, र बिहान ओछ्यानमै मृत भेटिएका थिए। उनी आउँदो बडादसैंमा घर फर्कने योजनामा थिए र अगस्ट ३१ तारिख राति ९ बजे मात्र श्रीमतीसँग कुराकानी गरेका थिए। उनको मृत्युको खबर परिवारले हिजाे बिहान मात्रै पाएको छ।
भक्त साउँदले विगतमा तत्कालीन जनयद्वमा जनमुक्ति सेनामा कार्यरत थिए। विगत ६ वर्षदेखि उनी मलेसियामा एक कम्पनीमा सेक्युरिटी गार्डको रूपमा काम गर्दै आएका थिए। उनका २ छोरा र श्रीमती हाल धनगढीको शिवनगरमा बस्दै आएका छन्।
उनको शव नेपाल ल्याउन आवश्यक कागजात पठाइसकिएको र प्रक्रिया अगाडि बढिरहेको जानकारी उनका आफन्त मोहन साउँदले दिएका छन्।
