नुवाकोटमा एयर डाइनेस्टीको हेलिकप्टर दुर्घटना भएको छ।
एयर डाइनेस्टीको हेलिकप्टर दुर्घटनामा परी मृत्यु भएका ५ जनाको शव फेला परेको नुवाकोटको शिवपुरी गाउँपालिका वडा नम्बर ७ का वडाध्यक्ष वीरबहादुर तामाङले जनाएका छन् ।
घटनास्थलमा पुगेका वडाध्यक्ष तामाङले ५ जनाको शव फेला परेको जानकारी दिए ।
‘म अहिले घटनास्थलमै छु । यहाँ ५ जनाको शव जलेको अवस्थामा फेला परेको छ,’ वडाध्यक्ष तामाङले भने ।
काठमाडौंबाट रसुवाको स्याफ्रुबेसीका लागि १ बजेर ५४ मिनेट जाँदा उडेको हेलिकप्टर दुर्घटनामा परेको हो ।
‘यहाँ चुचुरोमा ठोकिएर दुर्घटना भएजस्तो देखिन्छ,’ वडाध्यक्ष तामाङले भने, ‘हेलिकप्टर टुक्रा–टुक्रा भएको छ, केही बाँकी छैन ।’
हेलिकप्टर क्याप्टेन अरुण मल्लले उडाएका थिए । अन्य ४ जना यात्रु चिनियाँ नागरिक रहेको जानकारी आएको छ ।उनीहरू जुदाड टाङ (पुरुष), जी लि (पुरुष), यियाद वु –महिला) र जेमिङ सी (पुरुष) रहेका छन् ।
