सुर्खेत । वीरेन्द्रनगर नगरपालिकाकी नगरप्रमुख मोहनमाया ढकालले महिलालाई राजनीति गर्न कठिन हुने गरेको बताएकी छिन्। सोमबार वीरेन्द्रनगरमा भएको कार्यस्थलमा हुने हिंसा र दुर्व्यवहार सम्बन्धी तालिम तथा अन्तरक्रिया कार्यक्रममा बोल्दै नगरप्रमुख ढकालले यस्तो बताएकी हुन्।
सञ्चारिका समूह कर्णाली प्रदेशको आयोजना र वीरेन्द्रनगर नगरपालिकाको समन्वयमा भएको उक्त कार्यक्रममा नगरप्रमुख ढकालले महिलाहरुलाई राजनीति मात्र नभएर अन्य जुनसुकै क्षेत्र जान दुःख गर्नुपर्ने बताइन्।
नगरप्रमुख ढकालले भनिन्, ‘राजनीतिमा सफल हुन हाम्रो लक्ष्य के हो? त्यसलाई हामीले मध्यनजर गरेर अघि बढन आवश्यक छ। अहिलेको समयमा जुनसुकै क्षेत्रमा महिलाको सक्रियता बढेको भएता पनि धेरैनै हिंसा बोक्नु परेको छ।’
यस्तै, नगरप्रमुख ढकालले आफुसँग भएको आत्मविश्वासलाई बोकेर अघि बढेपछि जस्तो सुकै काम र प्रस्पिार्धा गर्न सकिने बताइन्।
ढकालले कार्यस्थलमा हुने हिंसाको न्युनिकरण गर्नका लागि आ–आफ्नो तर्फबाट राम्रो सोचको विकास गर्न सकेपछि हिंसा अन्त्य हुने दाबी गरिन्।
यस्तै, सोमबारबाट सुरु भएको उक्त तामिल असार १८ गते पनि सञ्चालन हुनेछ।
