सुर्खेत । कर्णाली प्रदेशको भुमि व्यवस्था, कृषि तथा सहकारी मन्त्री एवं प्रदेश सरकारका प्रवक्ता विनोदकुमार शाहले मन्त्रालयका प्रवक्ताहरुसँग बैठक गरेका छन्। कर्णाली प्रदेश सरकारको प्रवक्ताको जिम्मेवारी पाएसँगै मन्त्री शाहले शुक्रबार ८ वटै मन्त्रालयका प्रवक्ताहरुसँग बैठक बसेका हुन्।
मन्त्री शाहको अध्यक्षतामा बसेको बैठकमा कर्णाली प्रदेश सरकारले गरेका गतिबिधिहरुको प्रचारप्रसार, प्रवक्ताहरुबीचको समन्वय तथा सहकार्य लगायतका विषयमा छलफल भएका छन्।
यस्तै, उक्त बैठकमा मन्त्री शाहले मन्त्रिपरिषद् बाहेक प्रत्येक मन्त्रालयमा भएका मुख्यमुख्य निर्णयहरु प्रवक्ताहरुले आफुलाई जानकारी गराउनुपर्ने बताए।
साथै कर्णाली प्रदेश सरकार, मन्त्रिपरिषद्को बैठकले गरेका निर्णयहरु मासिक रुपमा प्रकाशन गर्ने प्रवक्ताहरुबीचको बैठकले निर्णय गरेको छ।
प्रवक्ताहरुको बैठमा मन्त्री शाहले संघीयता व्यवस्थापछि जसरी प्रदेश सरकारले आफ्नो क्षेत्रमा विकास गर्नुपर्ने त्यो तरिकाले कामहरु नभएको बताए।
उनले भने, ‘संघीय व्यवस्था अनुसार प्रदेश सरकारको विकासले तिब्रता लिन नसके पनि सरकारले राम्रा कामहरु प्नि गरेको छ। तर, ती कामहरुको प्रचारप्रसार नहुँदा जनताहरु सुसुचित हुनबाट बचेका छन्। त्यसैले सरकारले गरेका कामहरु बाहिर ल्याउनमा सरकार तथा मन्त्रालयका प्रवक्ताहरुको भूमिका महत्वपूर्ण हुनजान्छ।’
