प्रथम ज्ञान कर्णाली हाफ म्याराथनको पुरुष र महिलातर्फको उपाधि विभागीय टिम नेपाल आर्मी र सशस्त्र प्रहरीको पोल्टामा परेको छ ।
शनिबार वीरेन्द्रनगरमा भएको २१ किलोमिटरको हाफ म्याराथनमा पुरुषतर्फको उपाधि आर्मीका नरेन्द्र रावल जितेका छन् । उनले एक घण्टा ११ मिनेट २५ सेकेन्डमा निर्धारित दूरी पार गर्दै उपाधि जिते ।
पुरुषतर्फ एक घण्टा ११ मिनेट ४८ सेकेन्डमा दूरी पार गर्दै नेपाली सेनाकै रामजी बस्नेत दोस्रो र एक घण्टा १३ मिनेट २३ सेकेन्डमा निर्धारित दूरी पार गर्दै सशस्त्र प्रहरीका श्रीकेश राई तेस्रो भए ।
यस्तै, महिलातर्फको २१ किलोमिटर दौडको उपाधि सशस्त्र प्रहरीकी पुष्पा भण्डारीले जितिन् । भण्डारीले १ घण्टा २८ मिनेट १७ सेकेन्ड निर्धारित दूरी पार गरिन् ।
निर्धारित दूरी एक घण्टा ३२ मिनेट ४३ सेकेन्डमा पार गर्दै नेपाली सेनाकी सिर्जना पाण्डे दोस्रो र एक घण्टा ३६ मिनेट ४० सेकेन्डमा दूरी पार गर्दै जुम्लाकी राज्यलक्ष्मी रावत तेस्रो भइन् ।
प्रतियोगितामा विजयी भएका पुरुष तथा महिला खेलाडीलाई कर्णालीका मुख्यमन्त्री यामलाल कँडेलले क्रमशः ५५ हजार, ३० हजार र २० हजार रुपैयाँ नगदसहित ट्रफी र मेडलले सम्मान गरेका थिए ।
यस्तै, पाँच किलोमिटर छात्र दौडतर्फ प्रथम अजय विश्वकर्मा, द्वितीय नवराज बानियाँ तथा तृतीय रमेश बुढा र छात्रातर्फ प्रथम बिमला कार्की, दोस्रो पूर्णिमा बुढाथोकी र लक्ष्मी शाहीले तृतीय स्थान हासिल गर्न सफल भएका छन् । विजयी छात्र तथा छात्राहरूलाई क्रमशः १० हजार, ७ हजार र ५ हजार नगद तथा प्रमाण पत्र प्रदान गरिएको छ ।
विद्यालयस्तरीय पाँच किलोमिटर दौडमा प्रथम भएका आठ वर्षीय बालकलाई प्रोत्साहन पुरस्कारसमेत प्रदान गरिएको थियो । प्रतियोगितामा झन्डै एक हजार बढी धावकको सहभागिता रहेको थियो । कर्णाली प्रदेश खेलकुद परिषद्को आर्थिक सहयोग, केएल दुगड ग्रुरुपको ज्ञान खाद्यान्नको टाइटल स्पोन्सरमा रेस नेपालले प्रतियोगिता आयोजना गरेको थियो । म्याराथनको व्यवस्थापन क्रियटिभ गन्ज मिडिया एन्ड इभेन्ट म्यानेजमेन्टले गरेको थियो ।
दौड संस्कृतिको विकाससँगै पर्यटन प्रवद्र्धन गराउने इभेन्टका रूपमा स्थापित गराउने तथा आसन्न १०औँ राष्ट्रिय खेलकुदको प्रवद्र्धन गर्ने गरी कर्णाली हाफ म्याराथन आयोजना गरिएको हो ।
