काठमाडौँ। इङ्ल्यान्ड ‘सी’ सँगको मैत्रीपूर्ण खेलमा नेपाल पराजित भएको छ।
अल्डरसट टाउन एफसीको इबीबी रंगशालामा सोमबार सम्पन्न खेलमा इङ्ल्यान्ड ‘सी’ सँग नेपाल २-० गोल अन्तरले पराजित भएको हो।
इङ्ल्यान्ड ‘सी’ लाई जित दिलाउन निक काबाम्बा र क्यालम स्टेडले गोल गरे। खेलको आठौँ मिनेटमा काबाम्बाको गोलमार्फत इङ्ल्यान्ड ‘सी’ ले अग्रता लिएको थियो ।
उनले ओली हारफिल्डको क्रसलाई हेडमार्फत गोल गरे। त्यसको ५ मिनेटपछि गोलरक्षक तथा कप्तान किरणकुमार लिम्बुले कर्नरबाट आएको बललाई क्लिअर गर्न नसकेको बललाई नियन्त्रणमा लिँदै स्टेडले गोल गरे।
नेपालले यसअघि शुक्रबार ब्रिटिश आर्मीसँग पहिलो मैत्रीपूर्ण खेल खेलेको थियो। उक्त खेल गोलरहित बराबरीमा सकिएको थियो।
