काठमाडौं । इंग्ल्यान्डको पाँचौं डिभिजनको क्लबसँग खेल्ने नेपाली राष्ट्रिय फुटबल टिमको घोषणा भएको छ ।
अखिल नेपाल फुटबल संघ (एन्फा) ले आज नेपाली टिम सार्वजनिक गर्दा आयुष घलान, दीप कार्की र सुरजज्यू ठकुरीलाई भने बोलाएको छैन ।
प्रशिक्षक भिन्चेन्सो अल्बर्तो एनिसले २८ सदस्यीय प्रारम्भिक टोलीको घोषणा गरेका हुन् । यसअघि बहराइनसँग फिफा विश्वकप छनोट खेलेको टिमलाई नै प्रशिक्षक भिन्चेन्सोले निरन्तरता दिएका छन् । यसअघि व्यक्तिगत कारणले टिमबाहिर रहेका भएका रोहित चन्द र जिलेस्पीजंग कार्की टिममा फर्किएका छन् ।
किरणकुमार चेम्जोङ कप्तान रहेको टिमको गोलकिपरमा अभिषेक बराल, विशाल सुनार र सन्तोष महत छन् । डिफेन्डरमा अभिषेक लिम्बू, अनन्त तामाङ, विमल पाण्डे, विशाल बस्नेत, छिरिङ लामा, सनिश श्रेष्ठ, सौभाग्य राई, अजय चौधरी र योगेश गुरुङ छन् ।
त्यसैगरी, मिडफिल्डरहरु भरत खवास, लाकेन लिम्बू, मणिकुमार लामा, मनीष डाँगी, उत्सव राई, फत्तेमान घले र रोहण कार्की छन् । टिमको फरवार्डमा अञ्जन विष्टसँगै दिनेश हेन्जन, हिसुब थपलिया, समीर तामाङ, सञ्जीव विष्ट र राजेश परियार रहेका छन् । बन्द प्रशिक्षण वैशाख १० गते सुरु हुनेछ । नेपाल र इंग्ल्यान्ड ‘सी’ बीचको खेल वैशाख २४ गते हुनेछ ।
