काठमाडौं : सातौं संस्करणको अन्तराष्ट्रिय आमन्त्रित मेयर भोजपुर गोल्डकपमा ए डिभिजनका दुई क्लबले खेल्ने भएका छन् ।
भोजपुर गोल्डकप प्रतियोगितामा पछिल्लो संस्करणको ए डिभिजन लिग विजेता चर्च ब्वाईज युनाईटेड र त्रिभुवन आर्मी क्लबले खेल्ने पक्का भएको हो ।
यसअघि सेभेन ए साईडको रुपमा प्रतियोगिता सञ्चालन हुदै आएको थियो ।
‘अब पुरा सेट खेल्ने गरि प्रतियोगिता हुने भएपछि दुई ए डिभिजनका क्लब सहभागी हुने पक्का भएको छ ।’ आयोजक भोजपुर फुटबल संघका अध्यक्ष प्रविन सुवालले खेलपाटीसँग भने ।
‘तीन वटा ए डिभिजनका क्लब सहभागी गराउने योजना थियो । बजेट अनुसार दुई ए डिभिजनका क्लबले खेल्ने पक्का भएको छ ।’ सुवालले थपे ।
बैशाख ९ गतेदेखि १५ गतेसम्म सञ्चालन हुने प्रतियोगितामा आर्मी, चर्च सहित राजारानी फुटबल क्लब, खोटाङ भगवती स्पोर्ट क्लब, डाँगीहाट युथ क्लब, जर्जियन फुटबल क्लब र सलहेश युवा क्लब सहभागी हुने पक्का भएको छ ।
प्रतियोगिताले विजेताले ५ लाख रुपैयाँ र उपविजेताले ३ लाख रुपैयाँ प्राप्त गर्नेछन् । भोजपुर रंगशालामा हुने प्रतियोगितालाई मुख्य प्रायोजकको रुपमा भोजपुर नगरपालिकाले सहयोग गरेको हो ।
