सुर्खेत । नेकपा एकीकृत समाजवादी पार्टीका दैलेखका नेता तथा कार्यकर्ताहरू एमालेलेमा समायोजन भएका छन्। आइतबार जिल्ला कमिटी दैलेखले आयोजना गरेको पार्टी समायोजन कार्यक्रममा एमालेमा एकीकृत समाजवादीका पालिकादेखि केन्द्रीयस्तरका नेता–कार्यकर्ता समायोजन भएका छन्।
समायोजन हुनेमा एकीकृत समाजवादी पार्टीका केन्द्रीय सदस्य पार्वती विशुन्के र बरुनाथ योगी रहेका छन्।
दैलेखको दुल्लुमा भएको समायोजन कार्यक्रममा नेकपा एमालेका केन्द्रीय सचिव तथा कर्णाली प्रदेश इन्चार्ज लेखराज भट्टले पार्टीमा स्वागत गरेका हुन्।
यस्तै, समायोजन हुनेमा एकीकृत समाजवादीका केन्द्रीय सल्लाहकार केसर सिंह माझी, प्रदेश कमिटी सदस्य भुपेन्द्रबहादुर शाही, बालकृष्ण केसी, गोकर्ण माझी, आत्मराम उपाध्याय, खजुरी सुजी, जिल्ला कमिटी दैलेखका उपाध्यक्ष निरक शाही र जिल्ला कमिटी सचिवालय सदस्य कमल रिजाल एमालेमै फर्किएका छन्।
यस्तै, पार्टीका विभिन्न जनवर्गीय संगठन, पालिका कमिटी अध्ध्यक्ष तथा सदस्यहरु, जिल्ला कमिटी सदस्यहरु गरि पाँच सय बढी नेता–कार्यकर्ता एमालेमा समायोजन भएका छन्।
एकीकृत समाजवादीका केन्द्रीय सदस्य समेत पार्वती र बरुनाथ पार्टीका दैलेख जिल्ला सह–इन्चार्ज समेत हुन्।
गत माघ ११ गते भएको राष्ट्रिय सभा निर्वाचनमा कर्णालीबाट महिला क्लस्टरमा निर्वाचित भएकी सावित्री मल्ल दैलेखको इन्चार्ज रहेकी छन्। मल्ल पनि राष्ट्रिय सभाको निर्वाचन पहिला एमालेमा फर्किने तयारी समेत थियो। तर, एकीकृत समाजवादीका कर्णाली प्रदेश अध्यक्ष अमरबहादुर थापाले गठबन्धनकोतर्फबाट राष्ट्रिय सभाको टिकट दिने भनेपछि रोकिएकी थिइन्।
