सुर्खेत । नेकपा एकीकृत समाजवादी पार्टीका केन्द्रीय सदस्य द्धय पार्वती विशुन्के र बरुनाथ योगी एमालेमा फर्किने भएका छन्। आइतबार (फागुन २०) गते दैलेखकाे दुल्लुमा हुने एक कार्यक्रमबीच केन्द्रीय सदस्यसहित अन्य नेता–कार्यकर्ता एमाले पार्टीमा फर्किने भएका हुन्।
उनिहरुलाई नेकपा एमालेका केन्द्रीय सचिव तथा कर्णाली प्रदेश इन्चार्ज लेखराज भट्ट, केन्द्रीय सदस्य विनोदकुमार शाहले पार्टीमा स्वागत गर्ने एमालेका एक नेताले जानकारी दिए।
ती नेताका अनुसार एकीकृत समाजवादीका प्रदेश कमिटी सदस्य भुपेन्द्रबहादुर शाही, जिल्ला कमिटी दैलेखका उपाध्यक्ष निरकबहादुर शाहीको नेतृत्वमा दैलेख निर्वाचन क्षेत्र नम्बर–२ सबै नेता–कार्यकर्ता एमालेमा फर्किने तयारी भइरहेको छ।
एकीकृत समाजवादीका केन्द्रीय सदस्य समेत पार्वती र बरुनाथ पार्टीका दैलेख जिल्ला सह–इन्चार्ज समेत हुन्।
गत माघ ११ गते भएको राष्ट्रिय सभा निर्वाचनमा कर्णालीबाट महिला क्लस्टरमा निर्वाचित भएकी सावित्री मल्ल दैलेखको इन्चार्ज रहेकी छन्। मल्ल पनि राष्ट्रिय सभाको निर्वाचन पहिला एमालेमा फर्किने तयारी समेत थियो। तर, एकीकृत समाजवादीका कर्णाली प्रदेश अध्यक्ष अमरबहादुर थापाले गठबन्धनकोतर्फबाट राष्ट्रिय सभाको टिकट दिने भनेपछि रोकिएकी थिइन्।
