सुर्खेत । जिल्लाको चौकुने गाउँपालिकाको १५औँ गाउँ सभा गरेको छ। गाउँ सभामा आयोजित १५औँ गाउँ अधिवेशनमार्फत चालु आर्थिक वर्षको अहिलेसम्म भएका प्रगति, संशोधित बजेट तर्जुमाका साथै अर्धवार्षिक समीक्षा भएको छ।
गाउँपालिकाका उपा–अध्यक्ष नरबहादुर बान्तोलाले सभामा अहिलेसम्म भएको प्रगति प्रतिवेदन, संशोधित बजेट तर्जुमाका साथै मध्यवर्ती समीक्षा सहितको प्रतिवेदन पेश गरेका थिए।
यस्तै, उपाध्यक्ष बान्तोलाले पालिकाभित्रका विभिन्न विषयगत शाखा अन्तर्गत पालिकाले अपेक्षित उपलब्धी हासिल गरेको दाबी गरे।
साथै गाउँ सभाले संशोधित बजेट योजना तथा कार्यक्रम बहुमतले पारित गरेको छ।
उपाध्यक्षले प्रस्तुत गरेका कार्यक्रम र विधायन समितिले प्रस्तुत गरेका ऐन संशोधन प्रस्तावमा विभिन्न राय सुझावसहित गाउँ सभाले बहुमतले पारित गरेको हो।
यसैगरी पालिका सभामा सभाध्यक्ष तथा पालिका अध्यक्ष खडक बासपाने ‘विवश’ले विभिन्न विषय माथि प्रस्ताव गरेका थिए।
गाउँ सभामा प्रस्तुत सम्पूर्ण विषय सभाबाट पारित भएको पालिका अध्यक्ष विवशले जानकारी दिए।
उनका अनुसार तत्कालका लागि गाउँपालिकामा अत्यावश्यक रहेका विषयहरुमा गाउँ सभामा छलफल भएको थियो। गाउँ सभा सदस्यहरुबीच ती विषयमा छलफल भएर अधिकांश विषय पारित गरिएको छ।
यस्तै, गाउँ सभामा अधुरा ठेक्का तथा योजनाहरुको व्यवस्थापन, कोषको ऋण भुक्तानी तथा बेरुजु फछ्यौट गर्ने लगायतका विषयमा व्यापक छलफल भएको थियो।
गाउँ सभामा पालिकाका सभाका सदस्यले विभिन्न विषयमा धारणा राखेको थिए।
