काठमाडौँ । नेकपा माओवादी केन्द्रले ‘जनतासँग माओवादी विशेष रूपान्तरण अभियान’ अन्तर्गत उत्कृष्ट काम गर्ने प्रत्येक प्रदेशका तीन जनालाई सम्मान गर्ने भएको छ । बिहीबार बसेको सो पार्टीको स्थायी कमिटी बैठकमा अभियानबारे सातै प्रदेशको रिपोर्टिङपछि अध्यक्ष पुष्पकमल दाहाल प्रचण्डले यस्तो घोषणा गरेको उपाध्यक्ष अग्नि सापकोटाले जानकारी दिए ।
‘नेताहरूको कामको आधारमा मूल्याङ्कन गरेको छ’, सापकोटाले भने, ‘अभियानमा खट्ने नेता कार्यकर्ताहरूको चार क्याटोगरी विभाजन गरेर सर्वोत्कृष्ट गर्नेलाई सम्मान गरिनेछ ।’
उनले अध्यक्ष प्रचण्डको भनाइ उद्धृत गर्दै सापकोटाले भने, ‘सबै प्रदेशमा को–को उत्कृष्ट भए प्रत्येक प्रदेशका तीन जनाको नाम प्रस्तुत गर्न भन्नुभएको छ । सबैभन्दा नराम्रो गर्ने तीन जनाको नाम पनि प्रस्तुत गर्नु भन्नुभएको छ ।’
उनले राम्रो गर्नेलाई सम्मान पत्र दिने र ठिकै गर्नेलाई धन्यवाद, अलि ठिकठिकै गर्नेलाई अझ राम्रो गर्न भन्ने र नराम्रो गर्नेलाई कारबाही गर्ने गर्ने निर्णय भएको छ । कारबाहीको प्रक्रिया चेतावनी, निलम्बनलगायत हुनेछन् । त्यस्तो निर्णय केन्द्र र प्रदेशले गर्नेछन् । अभियानले पार्टीलाई चलायमान बनाएको निष्कर्ष निकाल्दै अब तीनवटा अभियान चलाउने निर्णय गरेको छ ।
