धनगढीको स्वस्तिक अस्पतालमा चिकित्सकको लापर्वाहीका कारण बिरामीको मृत्यु भएको भन्दै आफन्तले सडक अवरुद्ध पारेका छन् ।
कञ्चनपुरको बेलौरी नगरपालिका–१०, शिवनगरका ५६ वर्षीय ऐजनलाल चौधरीको चिकित्सकको लापर्वाहीका कारण मृत्यु भएका भन्दै उनीहरूले सडक अवरुद्ध पारेका हुन् ।
दुवै किड्नीमा पत्थरी भएपछि भदौ ९ गते ऐजनलाललाई अस्पताल भर्ना गरिएको थियो । उनको बायाँ किड्नीमा ११ एमएम र ९ एमएम गरी दुईवटा र दायाँ किड्नीमा साढे ९ एमएमको पत्थरी रहेको जानकारी चिकित्सकहरूले दिएका थिए ।
उपचारको क्रममा चिकित्सकले उनको बायाँ किड्नी झिकेपछि अत्यधिक रक्तश्रावले मृत्यु भएको अस्पतालले जनाएको छ । शल्यक्रियामा गरिएको त्रुटिले बिरामीको ज्यान गएको भन्दै आफन्त आक्रोसित बनेका छन् ।
मृतकका आफन्तले सो अस्पताल सडक क्षेत्रमा चक्काजा
म गराएका छन् ।
उनीहरूले धनगढीको शहीद गेटमा सडकमा अवरोध सिर्जना गर्दै सवारीसाधन चल्न दिएका छैनन् ।
यस्तै घटनाको बारेमा स्वस्तिक अस्पताल प्रशासन र मृतकका आफन्तबिच भएको वार्ता बिना निष्कर्ष टुंगिएको छ ।
घटनाको सत्यतथ्य सार्वजनिक, उपचारमा संलग्न चिकित्सकलाई कारबाही र उचित क्षतिपूर्तिको मागबारे मृतकका आफन्त र अस्पतालबिच छलफल भएपनी वार्ता बिना निष्कर्ष टुंगिएको हो ।
वार्ता निष्कर्षविहीन बनेपछि अस्पतालविरुद्ध आफन्तले प्रदर्शन सुरु गरेका हुन् ।
ऐजनलालको डाक्टर जोनस तिवारीको लापर्वाहीका कारण उपचारका क्रममै ९ गते दिउँसो २ बजे मृत्यु भैसकेको मृतक चौधरीका छोरा बुद्धिराम चौधरीले बताए । उनले जिल्ला प्रहरी कार्यालय कैलालीमा उजुरी दिदै अप्रेशन कोठामा लगेको २ दिन हुन लाग्दा समेत बिरामी बुवासँग भेट्न नदिएको र लापरवाहीले बुवाको मृत्यु भएको बताए । अस्पतालमा बिहानैदेखि सुरक्षा सतर्कता बढाइएको छ ।
यता अस्पतालले बायाँ किड्नीको पत्थरीको शल्यक्रियाका क्रममा रक्तश्राव नरोकिएपछि बिरामीको मृत्यु भएको बताएको छ । अस्पतालका अध्यक्ष महेश जोशीले अप्रेसनका क्रममा मृत्यु हुनुको कारण अहिले नै भन्न नसकिने बताए ।
