काठमाडौँ । गत माघ २७ गते देखि फागुन १ गतेसम्म चलेको दैलेखको आठौँ जिल्ला अधिवेशनबाट सर्वसम्मत नेतृत्व चयन भएको छ । नेता सूर्यबहादुर शाहीको नेतृत्वमा ९१ सदस्यीय जिल्ला कमिटी सँगै लेखा आयोग सर्वसम्मत चयन गरिएको हो ।
यस्तै, उपाध्यक्षमा प्रेमबहादुर बुढा, सचिवमा हिमालयजंग शाह, उप–सचिवमा मीनबहादुर बुढा र ताराकुमारी सोनी सर्वसम्मत चयन भएका हुन् ।
विगतदेखि नै एमाले दैलेखको नयाँ नेतृत्वका लागि निर्वाचन हुँदै आएको थियो । तर, यस पटक भने एमाले केन्द्रीय तथा कर्णाली प्रदेश कमिटीका पूर्वअध्यक्ष विनोदकुमार शाहका कारण सर्वसम्मत नेतृत्व चयन भएको चर्चा हुन थालेको छ ।
एमाले महासचिव शंकर पोखरेलले अधिवेशनको उद्घाटन गरेर काठमाडौँ फर्किएका थिए । नयाँ नेतृत्व चयनका लागि ९ सदस्यीय निर्वाचन मण्डल गठन गरिएको थियो ।
एमाले स्थायी कमिटी सदस्य यामलाल कँडेलको अध्यक्षमा बनेको अध्यक्ष मण्डलको सदस्यहरुमा पोलिटब्यूरो सदस्य लक्ष्मिप्रसाद पोखरेल, केन्द्रीय सदस्यहरु राजबहादुर बुढा, विष्णु रिजाल, विनोदकुमार शाह, धर्मराज रेग्मी, मिनासिंह रखाल, सूर्यकुमारी श्रेष्ठ र कर्णाली प्रदेश कमिटी उप–सचिव रविन्द्रराज शर्मा रहेका थिए ।
अध्यक्ष मण्डलमा रहेका थोरै मध्ये धेरै सदस्यहरुले सर्वसम्मत नेतृत्व छान्ने प्रयासमा थिए भने अन्य निर्वाचन नै गर्ने भनेर उम्मेदवार बोकेर अगाडी बढेको अध्यक्ष मण्डलका एक सदस्यले जानकारी दिए ।
उनले भने, ‘केही नेताहरुले अध्यक्ष पदमा उम्मेदवार प्रेमबहादुर बुढार नन्दकिशोर बस्नेतलाई बोकेर अगाडी बढ्नुभएको थियो । त्यो कुरामा विनोद शाहज्यूले सूर्यबहादुर शाहीको नेतृत्वमा सर्वसम्मत गरेपछि सबैतिर मिलेर जाने सुझाव दिएपछि अध्यक्ष मण्डलले उक्त प्रयास गरेको थियो । नजिता पनि त्यसैगरि आयो ।’
एमाले नेता शाहले अधिवेशन जारी रहेको समयमा सामाजिक सञ्जाल फेसबुकमा आफ्नो धारणा राख्दै दैलेखमा सर्वसम्मत हुने दाबी गरेका थिए । शाहको त्यो दाबी अन्तिममा आएर प्रमाणित भएको छ ।
उनले लेखेका थिए, ‘समाजिक सञ्जालमा आएको कुरा भइसकेको अवस्था होइन् । तर, परिस्थिति त्यतातिर उन्मुख छ । दैलेखमा सर्वसम्मत हुन्छ । नेकपा एमालेका सम्पूर्ण नेता कार्यकर्तालाई यस अभियानमा समावेश हुन हार्दिक आह्वान गर्दछु ।’
