सुर्खेत । आज हुने राष्ट्रियसभा निर्वाचनका लागि कर्णालीमा ३ सिटका लागि ६ जना उम्मेदवारबीच प्रतिस्पर्धा हुँदैछ। राष्ट्रिय सभा निर्वाचनमा कर्णाली प्रदेशमा एमाले एक्लै तीन दलीय गठवन्धनसँग भिड्दै छ।
कर्णालीमा नेपाली कांग्रेस, नेकपा माओवादी केन्द्र र नेकपा एकिकृत समाजवादीबीच राष्ट्रिय सभाका ३ सिटमा १-१ सिट लिने गरी भागबन्डा भएको छ।
तीन दलीय गठबन्धनबाट उम्मेदवार बनेका कांग्रेसबाट रुकुमका कृष्णबहादुर रोकाया, समाजवादीबाट दैलेखकी सावित्री मल्ल, माओवादीबाट कालीकोटका विष्णु विक मैदानमा छन्।
महिलातर्फ मल्ल, दलिततर्फ विक र अन्यतर्फ रोकाया उम्मेदवार छन्।
यस्तै, नेकपा एमालेले गठबन्धनबीच प्रतिस्पर्धा गर्नका लागि तीन जना उम्मेदवार मैदानमा खडा गरेको छ।
जसमा विमलाकुमारी शाही, हिक्मत विक र डिल्लीप्रसाद भट्ट उम्मेदवार छन्।
हुम्लाकी शाही महिला क्लस्टर, दैलेखका हिक्मत विक दलित क्लस्टर र मुगुका भट्ट अन्य क्लस्टरबाट उम्मेदवार बनेका छन्।
कसको मतभार कति?
सत्ता गठबन्धन मिलेर चुनावमा जान लागेकाले कर्णालीमा यसपटक एमाले शून्य हुने सम्भावना बढी छ।
कर्णालीमा नेपाली कांग्रेससँग प्रदेश र स्थानीय तहको निर्वाचनको कुल मतभार १ हजार ९ सय ७६ छ। स्थानीय तहका प्रमुख(अध्यक्ष ६ सय ८ र उप-प्रमुख-उपाध्यक्षबाट ५ सय ३२ र प्रदेशसभामा ७ सय ९५ मतभार छ। तर, स्थानीय तहमा नेपाली कांग्रेसबाट निर्वाचित दुई जनप्रतिनिधिको निधन भइसकेको छ।
जसमा दैलेखको महाबु गाउँपालिकामा निर्वाचित लक्षुमन गुरूङ र जाजरकोटको नलगाड नगरपालिका उपप्रमुख सरिता सिंहको निधन भएको छ।
सिंहको २०८० कात्तिक १७ गते बेलुका जाजरकोटमा गएको शक्तिशाली भूकम्पमा परि निधन भएको हो।
यस्तै, नेकपा माओवादी केन्द्रसँग स्थानीय तहको प्रमुख-अध्यक्ष गरी ४ सय ३७ र उप–प्रमुख-उपाध्यक्षको ४ सय ७५ र प्रदेशसभा सदस्य ६ सय ८९ गरी जम्मा १ हजार ६ सय १ मतभार छ।
एमालेसँग स्थानीय तहका प्रमुखरअध्यक्ष गरी २ सय ८५, उप–प्रमुख-उपाध्यक्षबाट ३ सय ८० र प्रदेशसभामा ५ सय ३० गरी कुल १ हजार १ सय ९५ मतभार छ।
यस्तै, एकीकृत समाजवादीसँग स्थानीय तहका प्रमुख-अध्यक्ष गरी ७६ र उप–प्रमुख-उपाध्यक्ष गरी १ सय १४ र प्रदेशसभामा ५३ गरी जम्मा २ सय ४३ मतभार छ।
स्थानीय तहका प्रमुखमा निर्वाचित भएका ५ जनाको मतभार ९५ रहेको छ। यी पाँच जना स्वतन्त्र जनप्रतिनिधि मध्ये केही पार्टीमा फिर्ता भइसकेका छन्।
यस्तै, कर्णाली प्रदेश सभामा राष्ट्रिय प्रजातन्त्र पार्टीसँग ५३ मतभार छ।
