मलेसियाको ऐतिहासिक शहर मलकामा किरात राई समुदायको मौलिक संस्कार, संस्कृति र पहिचान संरक्षण गर्ने उद्देश्यले आयोजना गरिएको “उभौली साकेला कार्यक्रम–२०२६” को सम्पूर्ण तयारी पूरा भएको छ।
कार्यक्रम आयोजक संस्था किरात राई यायोक्खा क्षेत्रीय समिति मलका, मलेसियाका संरक्षक ग्याबिन चाम्लिङ राईले हिरो नेपाल टिभिलाई जानकारी दिँदै कार्यक्रम सफल बनाउन सबै तयारी अन्तिम चरणमा पुगेको बताउनुभयो।
उहाँका अनुसार यही २४ मे २०२६ मा आयोजना हुने कार्यक्रममा मलेसियाका विभिन्न राज्यमा रहेका किरात समुदायसहित नेपालीहरुको उल्लेखनीय सहभागिता रहने अपेक्षा गरिएको छ।
आयाेजित कार्यक्रम मल्मसिया, मलकाकाे ओसेन स्थित देवान हलमा हुनेेछ ।
मलका राज्यमा पहिलोपटक औपचारिक रुपमा गठन भएको किरात राई यायोक्खा क्षेत्रीय समितिले आयोजना गर्न लागेको यो कार्यक्रमलाई विशेष महत्वका साथ हेरिएको छ।
संस्थाले विगतदेखि नै भाषा, भेषभूषा, संस्कार तथा मौलिक पहिचान जगेर्ना गर्ने उद्देश्यले विभिन्न सांस्कृतिक गतिविधि सञ्चालन गर्दै आएको जनाएको छ।
“हामी किरातहरू एक हौं, जाति, भाषा, संस्कार, संस्कृति बचाऔं” भन्ने मूल नारासहित आयोजना हुन लागेको कार्यक्रममा साकेला सिली नृत्य, सांस्कृतिक प्रस्तुति, पारम्परिक भेषभूषा प्रदर्शन तथा सामूहिक भेटघाट रहने आयोजकले जनाएको छ।
विदेशी भूमिमा रहेर पनि आफ्नो पहिचान र संस्कृतिलाई जिवन्त राख्ने उद्देश्यले आयोजना हुन लागेको कार्यक्रमले मलेसियामा रहेका नेपाली समुदायबीच आपसी एकता, सद्भाव र सांस्कृतिक सम्बन्ध अझ मजबुत बनाउने विश्वास गरिएको छ।
कार्यक्रममा विभिन्न सामाजिक संस्था, सञ्चारकर्मी, कलाकार तथा नेपाली समुदायका अगुवाहरुको समेत सहभागिता रहने जनाइएको छ। हिरो नेपाल टिभि लगायत विभिन्न मिडिया पार्टनरमार्फत कार्यक्रमको प्रत्यक्ष तथा विशेष प्रचार–प्रसार भइरहेको आयोजकले जनाएको छ।
