जोहोर, मलेशिया । गैर आवासीय नेपाली संघ (NRNA) क्षेत्रीय समिति, जोहोर, मलेशियाले नेपाली नारीहरूको महान पर्व हरितालिका तीज २०८२ को अवसरमा तीज विशेष सांस्कृतिक कार्यक्रम तथा दर खाने कार्यक्रम आयोजना गर्ने भएको छ।
आगामी २०२५ अगस्ट २४, आइतबार बिहान १०:०० बजेबाट दिउँसो ४:०० बजे सम्म जोहोर बाहारुस्थित IMPiana Nusajaya, Iskandar Puteri मा हुने कार्यक्रममा जोहोरमा कार्यरत र विभिन्न पेशामा संलग्न सम्पूर्ण नेपाली दिदीबहिनीहरूको सहभागिता रहनेछ।
संघका अनुसार, यस कार्यक्रम मार्फत प्रवासमा रहेका नेपाली दिदीबहिनीहरूबीच आपसी भेटघाट, सञ्जाल विस्तार तथा सांस्कृतिक परम्पराको संरक्षणलाई प्रोत्साहन गर्ने लक्ष्य राखिएको छ। कार्यक्रममा दर खाने विशेष अवसरसँगै तीज गीत, नृत्य तथा अन्य सांस्कृतिक प्रस्तुति रहनेछ।
आयोजक समितिले सम्पूर्ण नेपाली दिदीबहिनीहरूलाई कार्यक्रममा उपस्थित भई आफ्नो सांस्कृतिक पहिचानको संरक्षणमा योगदान दिन हार्दिक निमन्त्रण गरेको छ।
